تربت: چہ آپسر ءَ بیگواہ کنگ بیتگیں پاروک اسھاک ءُ شیرجان اسھاک ءُ آدگہ بیگواھیں مردمانی کھول ءُ جنیناں چہ آپسر ءَ روانکے کش اِتگ ءُ زوریں بیگواھیانی بگیری ءَ اوگام جتگ ءُ تربت پریس کلب ءَ اتکگ اَنت۔ آیاں تران کرتگ ءُ گوشتگ کہ گوستگیں شپ ءَ پاکستانی لشکر ءَ مئے گس ءَ بیڑ برتگ ءُ پاروک، شیرجان بیگواہ کرتگ اَنت ءُ پد ءَ ما پولیس ءِ کِر ءَ شتگیں پولیس ایپ آئی آر ءَ نبیسگ ءَ نہ اِنت۔
آئی ءَ گوشتگ کہ ھپت جنوری ءِ بانگواہ ءِ پنچ ءَ پاکستانی لشکر ءَ آپسر بنڈ ءِ بازار ءَ مئے گس ءَ بیڑ برتگ ءُ دوئیں برات شیرجان ءُ پاروک آوار جتگ ءُ بیگواہ کرتگ اَنت ءُ آیانی بابت ءَ مارا ھچ وڑیں ھال دیگ ءَ نہ اِنت۔ پولیس ھم مئے ایپ آئی آر ءَ نبیسگ ءَ نہ اِنت شھری ءِ بستار ءَ مئے ھک ءُ پاکستان ءِ راھند ءِبگیری اِنت۔
آئی ءَ گوشتگ کہ شیرجان ءُ پاروک ءِ برات شمس اسھاک 7 جولائی 2021 ءَ زور بیگواہ کنگ بیتگ کہ انگت بیگواہ اِنت، آئی بابت ءَ کھول ءَ ھچ وڑیں سرپدی دیگ نہ بوتگ کہ چون ءُ کج ءَ اِنت۔
آئی ءَ گوشتگ کہ اگاں زوریں بیگواھی ءِ بابت ءَ پولیس ءَ سی ٹی ڈی ءِ بگیری ءَ ایپ آئی آر نبشتہ نہ کرت گڑا ما لاچار ایں کہ پولیس تانہ ءِ دیم ءَ زھرشانی ءَ بہ نند ایں۔
آئی ءَ گوشتگ کہ اے دوئیں برات وتی ھند ءَ مزدوری کنگ ءُ گسءَ والینگ ءَ بیتگ اَنت آ گوں ھچ وڑیں سیاسی ءُ درکانودی کاراں ھوار نہ بوتگ اَنت۔ بلے لشکر ھمے سرپد بیت کہ آ میار بار اَنت آیانی سر ءَ اگاں چونیں بھتامے ھست گڑا آمیدگس ءَ پیش کنگ ءُ کانود ءِ رد ءَ سزا دیگ بہ بنت۔
اے پریس کانپریسءَ 8 دسمبر 2024 ءَ زور بیگواہ کنگ بیتگیں اپزل منزور ءُ شاہ زیب اللہ داد ءِ کھول گوں بیتگ اَنت ءُآیاں وتی آزیزانی آجوئی ءِ لوٹ کرتگ۔
