بلوچستان لبریشن پرنٹ ءِ جارکش میجر گھرام ءَ ماں رسانکدر ءَ وتی شنگ کُرتگیں درشانے ءَ گْوشتگ کہ سرمچاراں شال ءُ پسنی ءَ دو جتائیں اُرشاں پولیس ءُ کوسٹ گارڈ ءِ کارمند نشانگ کُرتگ ءُ جانی تاوان داتگ اَنت۔
جارکش ءَ گْوشتگ کہ سرمچاراں 7 جنوری ءِ بیگاہ ءِ ھپت ءَ شال ءَ سریاب گاھی ھان چاراہ ءَ پولیس ءِ گاڑی ءِ سر ءَ اُرش کُرتگ کہ چہ ایشی ءَ سَے پولیس کارمند سک ٹپی بیتگ۔
آئی ءَ گْوشتگ کہ اے اُرش پہ پولیس ءِ کڈن کنگ ءَ بیتگ کہ آ زورگریں لشکر ءِ ھواری ءَ بلوچ چکچینی ءُ کمشرپ کنگ ءَ شریدار مہ بیت ءُ بلوچ آجوئی جُھد ءِ دیم ءَ اڑاند جوڑ مہ بیت۔
آئی ءَ گْوشتگ کہ اُرش ءَ پد پولیس ءَ سرمچارانی سر ءَ تیرگْواری کُرتگ کہ پولیس ءِ تیرگْواری ءَ یک زھگے بیران بیتگ۔ ما آئی کھول ءِ گماں شریدار ایں۔ما یکبرے پد ءَ گوں بلوچ راج ءَ دزبندی کن ایں کہ آ چہ زورگریں لشکر ءُ آئی ءِ کمکاراں وت ءَ دور بہ دار اَنت، داں کہ آیاں جانی تاوان مہ بیت۔
جارکش ءَ گْوشتگ کہ دگہ یک اُرشے ءَ سرمچاراں ھپت جنوری ءِ بیگاہ ءِ ھپت ءُ چِل ءَ پسنی شھر ءَ کٹاؤ بنگلہ بازار ءَ کوسٹ گارڈ ءِ بنجل ءِ پھازداری چوکی ءِ سر ءَ دستی بمب اُرشے کُرتگ، چہ ایشی ءَ کوسٹ گارڈ ءِ دو کارمند ٹپی بیتگ۔
میجر گھرام ءَ دوئیں اُرشانی زمہ واری منّ اِتگ ءُ گْوشتگ کہ داں بلوچستان ءِ آجوئی ءَ زورگریں لشکر ءُ آئی ءِ کمک کنوکانی سر ءَ مئے اُرش برجاہ بنت۔
