بلوچ لبریشن آرمی ءِ جارکش جیھند ءَ وتی درشانے ءَ تربت ءَ پِدائی اُرش ءِ زمہ واری منّ اِتگ ءُ گْوشتگ کہ پدائی ایلیٹ یونٹ مجید بریگیڈ ءَ چار جنوری ءَ تربت شھر ءَ ھشت کلومیٹر دور بھمن ءَ زورگریں پاکستانی لشکر ءِ یک کاروانے ءِ سر ءَ بیگاہ ءِ پنچ ءُ چل ءُ پنچ ءَ اُرش کُرتگ ءُ جانی تاوان داتگ۔ دژمن ءِ اے کاروان ءِ پنچ بس ءُ ھپت کسانیں گاڑی بیتگ اَنت،چہ کراچی ءَ تربت ءَ ایپ سی ءِ بنجل ءَ روگ ءَ بیتگ اَنت۔ مجید بریگیڈ ءِ پدائی ھمبل ءَ شورہ ءَ پُرّیں گاڑی ڈک داتگ،کہ چہ ایشی ءَ 47 لشکری کارمند مُرتگ ءُ 30 ءَ گیش ٹپی بیتگ۔ اُرش ءَ یک بسے سرجم ءَ تباہ ءُ آدگراں کمو تاوان بیتگ ءُ لشکر ءِ یک گاڑی یے سُتکگ ءُ پُر بیتگ۔
بی ایل اے ءِ جارکش ءَ گْوشتگ کہ سیزدہ گاڑیانی کاروان ءَ زورگریں لشکر ءِ ایم آئی 309، ایپ سی ایس آئی یو، ایپ سی 117 ونگ، ایپ سی 326ونگ، ایپ سی 81 ونگ ءِ کارمند ھوار بیتگ اَنت ءُ کاروان ءَ موکل ءَ آھگ ءَ بیتگیں ایس ایس پی پولیس ریٹائرڈ لشکری کیپٹن زوھیب مھسن ءِ گاڑی ھم ھوار بیتگ۔
آئی ءَ گْوشتگ کہ اے اُرش گل ءِ انٹیلیجنس ونگ "زراب” ءِ ھال دیگ ءِ بنیاد ءَ آسر کنگ بیتگ۔ زراب ءَ اے دلجمیں ھال داتگ کہ دژمن ءِ کاروان چہ کراچی ءَ دیم پہ تربت ءَ پیداک اِنت ءُ اے کاروان ءَ دژمن ءِ کارمند گون اَنت۔ اے اُرش ءِ سوبمندی ءَ مئے انٹیلیجنس ءَ جوانیں کِردے پیلو کُرتگ ءُ پِدائی ھمبل ءِ بے دروریں کِرد گون اِنت۔ اے اُرش یک تچکیں کلوھے پہ زورگریں ریاست ءَ کہ بلوچستان ءِ سرڈگار پہ آئی ءَ ناگیگ اِنت۔
جیھند ءَ گْوشتگ کہ اے پِدائی اُرش بلوچ لبریشن آرمی ءِ پِدائی ھمبل شھید بھار الی پنام کاروان ءَ کُرتگ۔بھار الی دشت ھوچات ءَ مراد مھمد بازار ءِ جھمنند بیتگ۔ 2017 ءَ بلوچ راجی جُھد ءَ ھوار بیتگ ءُ شھر ءُ کوہ ءَ دوئیں پڑاں وتی کِردے پہ جوانی پیلو کُرتگ۔2022 ءَ چہ وتی رزا ءَ مجید بریگیڈ ءَ ھوار بیتگ ءُ وتی جان ندر کُرتگ ءُ پہ مدامی نمیران بیتگ۔
بی ایل اے ءِ جارکش ءَ گْوشتگ کہ اے اُرش گل ءِ ھما کارشونیانی بھر اِنت کہ ایشی ءِ مول ءُ مُراد بلوچستان پہ زورگریں ریاست ءَ ناگیگ کنگ اِنت۔ انٹیلیجنس ونگ "زراب” ءِ دلجمیں ھال دیگ ءَ پد بلوچ لبریشن آرمی ءَ ھمے شور کُرتگ کہ زورگریں لشکر، ریاست ءِ چاریگ ءُ پہ باپاریاں بلوچستان ءِ شھدگ ناگیگ جوڑ کنگی اَنت۔ھمے شوندات ءِ رد ءَ جتائیں وھد ءَ ٹوھیں اُرشانی دْرچ بندات کنگ بیتگ۔ بلوچ ءَ کڈن کن ایں کہ آ چہ دژمن ءِ کارواناں وت ءَ دور بہ دار اَنت ءُ ٹرانسپورٹانی واھداں گْوشگ لوٹ ایں کہ آ زورگریں لشکر ءَ ھچ وڑیں آسراتی مہ دے اَنت،اگاں نہ گڑا وتی تاوان ءِ زمہ وار وت اَنت۔ بی ایل اے بلوچ مادن ءُ مڈیانی لُٹ ءُ پُل ءَ ھواریں بارکشیں گاڑیانی واھنداں ھم کڈن کنت کہ آ بلوچ ءِ مڈیانی لُٹ ءُ پُل کنگ ءَ ھوار مہ بنت اگاں نہ گڑا آیانی دُرسیں گاڑی ماندارگ بنت۔
آئی ءَ گْوشتگ کہ اے اُرش گل ءِ ھما کولانی پاسداری اِنت کہ داں بلوچستان آجو مہ بیت،زورگریں ریاست ءِ بگیری ءَ جُھد برجاہ بیت۔ سنگت بھار الی ءِ دیمونی ءَ اے پیشداشت کہ بلوچ راج پہ آجوئی ءَ ھرچ وڑیں دیمونی ءَ چک ءُ پد نہ بیت۔زورگریں ریاست ءَ چو مدامی ئیں وڑ ءَ اے اُرش ءَ پد ھم بے میاریں بلوچ راج ءِ سر ءَ تیرگْواری کُرتگ ءُ باز مردم آوار جتگ۔
جیھند ءَ گْوشتگ کہ بلوچ لبریشن آرمی چہ ھمے اُرش ءِ پارست ءَ یکبرے پد ءَ تچکی ءَ گْوش ایت کہ زورگریں ریاست ءِ زوراکیانی بگیری ءَ مئے جُھد مھکم اِنت۔اے اُرش نہ ایوک ءَ پہ دژمن ءَ یک کلوھے بلکیں اے سدکی ھم دنت کہ آجوئی ءِ راہ ءَ داتگیں دیمونی گار نہ بنت۔ ما وتئ جُھد ءَ برجاہ دار ایں ءُ دژمن ءَ ھرچ پِڑ ءَ پروش دئیں۔ مئے سرڈگار پہ زورگریں ریاست ءَ مدام ناگیگ بیت ءُ ما داں آجوئی ءَ چہ وتی جُھد ءَ پشت کِنز نہ بیں۔
