بلوچ لیبرشن آرمی ءَ ماں رسانکدر ءَ وتی شنگ کرتگیں درشانے ءَ سال 2024 ءَ زورگریں پاکستانی لشکر ءُ گوں آئی ءَ ھواریں شرکت ءُ شوربندیانی سر ءَ کاروائیانی گزارش شنگ کرتگ۔
بی ایل اے ءَ گوشتگ که 2024 ءَ سرجم ءَ سیسد ءُ دو اُرش کرتگ۔ شش پدائی اُرشاں ھوار ده اسپیشل کاروائی کرتگ۔ ھمے وڑ ءَ یکسد ءُ ھشت بمب اُرش کرتگ۔
آئی ءَ گوشتگ که 2024 ءَ بی ایل اے ءِ سرمچارانی اُرشاں پاکستانی لشکر ءِ 545 کارمند مرتگ ءُ 378 ٹپی بیتگ۔ ھمے وڑ ءَ 78 چریک کُشگ بیتگ، چه ایشاں لھتے دزگیر کنگ ءُ رند ءَ کشگ بیتگ اَنت۔
رپورٹ ءِ تہ ءَ 173 جتا جتائیں اُرشاں دشمن ءَ بازیں کچے ئِے ءَ مالی تاوان بیتگ۔اِے اُرشاں دژمن ءِ گاڑی ، پرپٹ ، ڈرون ، ریل ٹرک ،گیس ءِ پمپ ، سنگ بروکیں گاڑی ءُ ریل پٹی ءِ پھل نشانگ کنگ بیتگ اَنت۔
آئی ءَ گوشتگ که بی ایل اے ءَ سال 2024 ءَ شش پدائی اُرش کرتگ که اِے اُرشاں سی ءُ ھپت پدائی بیتگ اَنت۔مجید برگیڈ ءِ پدائیاں آپریشن دره ءِ بولان ءَ پاکستانی لشکر ءِ ھیڈکوارٹر ، آپریشن زرپھازگ ءَ گوادر ءَ چیریں ادراھانی کارگس ءُ تربت ءَ پاکستانی نیول ایئر بیس ، آپریشن ایروپ ءَ بیله ءِ بنجل نشانگ کرتگ۔ ھمے وڑ ءَ کراچی ءَ گوں پاکستان ءِ شوربندیاں ھواریں چین ءُ شال ءَ پاکستانی لشکر ءِ نان کمیشنڈ کارمند ھم نشانگ کنگ بیتگ اَنت۔
آئی ءَ گوشتگ که بی ایل اے ءِ اسپیشل ٹیکنیکل آپریشن اسکواڈ ءُ پتھ اسکواڈ ءَ چار آپریشن کرتگ۔ پتھ اسکواڈ ءَ شال ءِ ھند شھبان ءَ پاکستانی چیریں ادراھانی کارمند دزگیر کرتگ اَنت ءُ ایس ٹی او اس ءَ کلات ، اسکلکو ءَ زورگریں لشکر ءِ بنجلے گپتگ،نومبر ماه ءَ پتھ اسکواڈ ءَ کلات ءِ ھند شاه مردان ءَ یک ترندیں اُرشے ءَ پاکستانی لشکر ءِ مزنیں بنجل گپتگ۔ ھمے وڑ ءَ ایس ٹی او ایس ءَ نوشکے ءَ کاروائی کرتگ ءُ چیریں ادراھانی کارمند دزگیر کرتگ اَنت۔
بی ایل اے ءَ وتی گزارش ءَ گوشتگ که مئے سرمچاراں سال 2024 ءَ بلوچستان ءَ بیست ءُ پنچ جتا جتائیں جاھاں شھدگ بند کرتگ، سرمچاراں پانزده بنجل گپتگ ءُ پنجاه ءُ پنچ چریک ھم دزگیر کرتگ۔ ھمے وڑ ءَ جتا جتائیں کاروائیاں چه دژمنیں لشکر ءَ بازیں کچے ئِے سلاه ءُ گولا گپتگ۔
آئی ءَ گوشتگ که 2024 ءَ پاکستانی لشکر ، چیریں ادراه ءُ گوں پاکستان ءَ ھواریں چینی شوربندیانی سر ءَ اُرشانی میان ءَ بی ایل ایل ءِ پنجاه ءُ دو سرمچار شھید بیتگ که آیانی ته ءَ مجید برگیڈ ءِ سی ءُ ھپت پدائی بیتگ اَنت۔
بی ایل اے ءَ گوشتگ که مئے اُرش پاکستانی لشکر ، آئی ءِ چریک ءُ شوربندیانی سر ءَ داں ھما وھد ءَ که آ چه بلوچستان ءَ درآھگ ءَ لاچار به بنت برجاه اِنت۔
