بلوچ نیشنل موومنٹ ءِ سرکماش ڈاکٹر نسیم ءَ گْوشتگ کہ ریکوڈک ءِ شوربندی ءِ تہ ءَ سئودی ءِ ھوار بیگ ءَ ما بلوچ راجی ھک ءُ سرڈگار ءِ بگیری ءَ تُرندیں گامگیجے سرپد بیں۔ ریکوڈک شوربندی چو آدگہ شوربندیانی وڑ ءَ بلوچ ءِ لُٹ ءُ پُل ءُ ایردستی ءِ برجاہ دارگ ءِ شونداتے۔اے دُرسیں شوربندیاں بلوچ جُست کنگ نہ بیتگ ءُ بندات کنگ بیتگ اَنت۔ پاکستان یک زورگریں ریاستے ءُ بلوچ راج آئی ءِ بگیری ءَ جُھد کنگ ءَ اِنت۔اے شوربندیانی تہ ءَ آدگہ ڈیھ ءُ شرکتانی ھوار بیگ ھم بلوچ راج ءِ سرڈگار ءِ سر ءَ اُرش ءُ لُٹ ءُ پُل زانگ بیت۔
آئی ءَ گْوشتگ کہ پاکستانی ریاست بلوچ راجی مڈیاں لُٹ ءُ پُل کنگ ءُ وتی زورگری ءِ برجاہ دارگ ءَ بلوچستان ءَ ایمن ءُ بلوچ راجی جُھد ءَ رد کنگ ءُ جھان ءِ باپاریاں ریپینگ ءَ اِنت۔ابید بلوچ ءِ رزا ءَ گوں پاکستان ءَ ھوار بیگ، نہ ایوک ءَ بلوچ راجی مڈیانی لُٹ ءُ پُل کنگ اِنت بلکیں بلوچ راج ءِ ھستمان ءِ بگیری ءُ بلوچ چکچینی ءَ ھوار بیگ اِنت۔
آئی ءَ گْوشتگ کہ بلوچ یک پُرایمنیں راجے ءُ گوں وتی ھمساھگاں نزیکی کنگ لوٹ ایت۔سئودی ارب مئے ھمساھگ ءُ اسلامی ڈیھے، ما ھمے اوست ءَ دار ایں کہ سئودی ارب گوں وتی دیمروئی ءِ نوکیں واھگاں گوں بلوچ راج ءَ ھم پَتی ءُ کمک کنت، بلے چہ ایشی ءَ ابید سئودی ءَ بلوچ سرڈگار ءِ سر ءَ یک زورگریں ریاستے ءِ ھمراھداری کُرت کہ بژنی گپے۔
ڈاکٹر نسیم ءَ گْوشتگ کہ بلوچستان ءَ رود ءُ تلاہ ءَ ابید دگہ مڈی باز اِنت ءُ ھپت دھک بیت کہ پاکستانی ریاست لُٹ ءُ پُل کنگ ءَ اِنت۔اے مڈیانی واھُند بلوچ اِنت ءُ بلوچ ءَ ابید کس ءَ ھک نیست کہ اے مڈیاں دست بہ جنت۔پاکستانی ریاست گوں وتی زورگری شونداتاں بلوچ ءِ مڈیاں لُٹگ ءُ بلوچ ءِ چُکچینی ءَ کنگ ءَ اِنت۔ ریکوڈک ھمے لُٹ ءُ پُلانی یک نوکتریں دروے کہ دگہ ڈیھاں ھوار کنگ ءُ بلوچ راج ءِ ھک ءَ جنگ ءَ اِنت۔
آئی ءَ گْوشتگ کہ اے رنگیں مسام ءُ شوربندی میان استمان ءِ کانود ءُ راھبندانی بگیری اِنت۔ دگہ راجے ءِ زمین ءُ مڈیانی سر ءَ زورگر ءِ کُرتگیں پیسلہ درکانودی یے زانگ بیت، وھدے کہ آ راج پہ وتی زمین ءُ مڈیانی پھریزگ ءَ گھگیری کنگ ءَ اِنت۔ ما چہ سئودی ارب ءَ دزبندی کن ایں کہ آ بلوچ راجی جُھد ءُ آئی ءِ ھکاں بہ زانت ءُ چوشیں ھچ شوربندیانی بھر جوڑ مہ بیت کہ بلوچ راج ءِ سیتانی بگیری ءَ بہ بیت۔
بی این ایم ءِ سرکماش ءَ گْوشتگ کہ پہ سئودی ارب ءِ وڑیں ٹوھیں ڈیھاں ھژدری اِنت کہ آ ایردستیں راجانی کمک ءَ بہ کنت، نہ کہ آیانی مڈیانی لُٹ ءُ پُل کنگ ءَ زوراک ءِ ھمراھداری ءَ بہ کنت۔ اگاں سئودی ارب ءَ اے دمگ ءُ میان استمان ءَ وتی جاگہ مُھکم کنگی اِنت گڑا گوں بلوچ ءَ وتی روِشت ءَ شر بہ کنت۔ریکوڈک شوربندی ءَ سئودی ارب ءِ ھوار بیگ ءَ نہ ایوک ءَ بلوچ راج ءَ تاوان بیت بلکیں سرجمیں دمگ ءَ یک ردیں دروے جوڑ بیگ ءَ اِنت۔ ما چہ سئودی ارب ءَ ھمے لوٹ ایں کہ آ اے بابت ءَ چار ءُ گزار بہ کنت ءُ بلوچ راج ءِ کمک ءَ بہ کنت،داں کہ اے دمگ ءَ ایمنی،انساپ ءُ دیمروئی بہ بیت۔
آئی ءَ گْوشتگ کہ بی این ایم ایشی ءِ گوں تُرندیں دانکاں ایرجنت ءُ تچکی ءَ گْوش ایت کہ بلوچ راج وتی مڈی ءُ ھکانی پھریزگ ءَ ھرچ پیمیں گامگیج زور ایت۔ما چہ وتی ھمساھگیں ڈیھ ءُ چہ میان استمان ءَ دزبندی کن ایں کہ آ بلوچ راج ءِ جُھد ءَ سرپد بہ بنت ءُ بلوچ ءِ ھکانی پھریزگ ءَ وتی کِرد ءَ پیلو بہ کن اَنت۔
