بلوچ نیشنل مومنٹ ءِ بنجاھی جارکش ءَ جارے شنگ کُرتگ ءُ گْوشتگ کہ بی این ایم زور بیگواھیانی جیڑہ ءِ سر ءَ ماں جنیوا ءَ بیوکیں اولی جھانی پتر ءَ بھر زور ایت۔اے پتر 15 جنوری ءَ بہ گر داں 16 جنوری 2025 ءَ برجم دارگ بیت۔
آئی ءَ گْوشتگ کہ اے مچی ءِ میان ءَ گدانے جنگ بیت کہ آئی ءِ تہ ءَ اکسانی نمائش،ماں زورگپتیں بلوچستان ءَ پاکستانی لشکر ءِ دست ءَ زور بیگواھیں مردمانی بارہ ءَ سرپدی دیگ بیت۔
آئی ءَ گْوشتگ کہ بی این ایم ءِ جھگیر نند ءُ نیادانی تہ ءَ ھم بھر زور اَنت ،اود ءَ زور بیگواھیانی آماچ بیتگیں مردم ءُ آیانی کھولانی مارشتاں درشان کن اَنت ، پہ ھک ءُ زور بیگواھی ءِ گر ءُ دار ءَ توار چست کن اَنت۔
اے پتر گوں ’ زور بیگواھیانی بگیری ءِ کنونشن (سی ای ڈی آئی )، راجانی سنت ءِ زور بیگواھیانی پتر (سی ای ڈی) ، زور یا پہ نادلکشی بیگواھیانی سر ءَ راجانی سنت ءِ کاربولک (وی جی ای آئی ڈی) ءُ راجانی سنت ءِ مردمی اگبالانی کارگس ( او ایچ سی ایچ آر) ‘ ءِ ھمکاری ءُ ھمدستی ءَ برجم دارگ بیگ ءَ اِنت۔
