بلوچ یکجھتی کمیٹی ءَ ماں رسانکدر ءَ وتی شنگ کرتگیں جارے ءَ گوشتگ کہ پاکستانی لشکر ءِ کارمنداں نوید ء ھمید ءُ زریپ ء اُمر ناھک ءَ شھید کُرتگ ءُ آیانی لاش دور داتگ اَنت۔ نوید ءُ زریپ ءِ کھول ءَ مرچی ھپت روچ اِنت کہ شھید پدا اھمد چار راہ ءَ زھرشانی ءَ نشتگ اَنت ءُ وتی لوٹ اِش دمگی انتزامیہ ءِ دیم ءَ ایر کُرتگ اَنت۔
آئی ءَ گوشتگ کہ ڈی سی یک رندے ھم نندانک ءَ نیاتکگ ءُ پہ جیڑہ ءِ گیش ءُ گیوار کنگ ءَ گامگیج زورگ ءَ نہ اِنت۔ ڈی سی ءَ اے سی مھمد نندانک ءَ دیم داتگ بلے آئی کھولانی یک لوٹے ھم نہ منّ اِتگ۔
بی وائی سی ءَ گوشتگ کہ باند ءَ سھب ءِ ادار نو ءَ شھید نوید، شھید زریپ ءُ آدگہ زوربیگواھیں مردمانی کھولانی نیمگ ءَ ڈی بلوچ بند کنگ بیت۔ ما گوں درسیں بھرگاں سیادی داروکیں مردماں لوٹ کن ایں کہ آ بیا اَنت ءُ شھیدانی ءُ زوربیگواھیں مردمانی کھولانی ھمراہ داری ءَ بہ کن اَنت۔
