بلوچ نیشنل مومنٹ ءِ بنجاھی رسانکدری کارگشاد کازی ریھان ءَ نوکیں سال ءِ درگت ءَ ماں رسانکدر ءَ وتی پریس کانپرنسے ءَ گْوشتگ کہ بلوچستان ءِ جاور چہ کس ءَ چیر نہ اَنت، پاکستان ءِ زورگری ءَ بگر داں مرچی بلوچ راج ءِ چکچینی برجاہ اِنت۔چکچینی ءَ مردم کُشت ءُ کوش گْوش اَنت بلے اے رستری زوراکیانی یک بھرے کہ چکچینی ءَ چہ یک راجے ءَ آئی ءِ زمین،زبان، دود ءُ ربید پُلگ بنت ءُ زورگر وتی دروگیں پجار ءَ ھما راج ءِ سر ءَ مُش ایت۔
آئی ءَ گْوشتگ کہ چہ 27 مارچ 1948 ءَ بلوچستان ءِ سر ءَ پاکستان ءِ زوراکی برجاہ اِنت،کہ ایردستی ءِ بگیری ءَ راجی جُھد ءَ ھلاس کنگ لوٹ ایت۔مرچی کہ ما گوں شُما گپ کنگ ءَ آں سال 2024 ھلاس بیتگ ءُ نوکیں سال 2025 ءِ اولی روچ اِنت۔نوکیں سال پہ آجوئیں راجاں نوکیں پدانکے بیت، مردم نوکیں واب گند اَنت،چہ جیڑہ ءُ جنجالاں دربر اَنت ءُ گھتریں شور ءُ شوربندی کن اَنت۔آجوئیں مردم وتی لوٹ ءُ واھگاں درشان کن اَنت، نوکیں جوزگ ءُ کولانی در جنگ ءِ جُھد ءَ کن اَنت۔ بلے بلوچ راج وتی آؤکیں باندات ءِ پد جنگ ءَ گار اِنت۔
آئی ءَ گْوشتگ کہ ما مرچی اِد ءَ پہ نوکیں سال ءِ شاتکامیانی برجم دارگ ءَ نیاتکگ ایں، بلکیں ھمے درد ءِ درشان کنگ ءَ اتکگیں کہ مئے سرڈگار پہ ما کوشجاھے جوڑ کنگ بیتگ۔مئے لاش ماں گیاباناں چگل دیگ بیگ ءَ اَنت۔مئے مردماں ھمک روچ پاکستانی لشکر درکانودی آوار جنت ءُ بیگواہ کنت۔آزارجاھانی تہ ءَ مئے مردماں کُش ایت ءُ لاشاں چگل دنت ءُ کھولاں گیش زوراکی کنگ ءِ بیھار دنت،وھدے کہ زوراکیانی بگیری ءَ مردم زھرشانی کن اَنت گڑا زوراکی ءِ نشانگ کنگ بنت۔
آئی ءَ گْوشتگ کہ اے سال ءَ سرجمیں بلوچستان ءَ ھنچیں وئیل دیم ءَ اتکگ کہ ھمک وئیل پہ مردمگری شرمندگ بیت۔بلے ما دسمبر 2024 ءِ لھتیں وئیل جھان ءِ دیم ءَ پدر کنگ لوٹ ایں۔ بلوچ نیشنل موومنٹ ( بی این ایم ) ءِ انسانی ھکانی ادارہ ’ پانک‘ ءِ سرجمیں سال ءِ رپورٹ ءَ ما آوکیں روچانی تہ ءَ شنگ کن ایں۔مرچی ایوک ءَ دسمبر ءِ ماہ ءِ وئیلانی کچ ءُ کساس ءَ بیان کن ایں۔
کازی ریھان ءَ گْوشتگ کہ چاگردی رسانکدر ءَ نبشتہ کنوک ءُ گوشداروکاں ما ھمے اوست ءَ گوں شُما دلگوشاں کہ شُما زور ءُ زوراکیانی بگیری ءَ پہ ما توار چست کن اِت۔زریپ ءِ اومر ءِ وئیل رسانکدر ءَ شنگ بیتگ،کیچ ءِ بنجاھی شھر تربت ءَ ھوار جتائیں ھند ءُ دمگاں مردماں آئی ءِ ناھکیں کوش ءِ بگیری ءَ زھرشانی کنگ بیگ ءَ اِنت۔بی این ایم ءِ انسانی ھکانی ادارہ ’ پانک ‘ بلوچستان ءَ بیتگیں ھرچ وئیل ءَ دیم ءَ کار ایت۔اے وئیل ءِ بابت ءَ ھم مئے ادارہ ءَ زوت شُمارا سرپدی داتگ۔اے اولی وئیل نہ اِنت کہ پاکستانی لشکر ءَ مردمے آوار جتگ ءُ اے دگہ روچ ءَ آئی ءِ لاش چگل داتگ۔اے وڑیں وئیل پمشکا بنت کہ آیاں کس جُست نہ کنت۔
آئی ءَ گْوشتگ کہ زریپ ء اومر دازن تمپ ءِ جھمنند ءُ بے میاریں مردمے بیتگ۔آئی ءِ کھول مدام پاکستانی لشکر ءِ زوراکیانی آماچ بیتگ۔شش سال پیش زریپ ءِ زھگے پاکستانی لشکر ءَ آوار جنگ ءَ پد زور بیگواہ کُرتگ ءُ آزار دیگ ءَ پد یل داتگ۔پاکستانی لشکر ءَ مدام زریپ ءِ لوگ ءَ بیڑ بُرتگ ءُ مردم ھر وڑیں زوراکی ءِ نشانگ کُرتگ اَنت، لوگانی سامان ھم دُز اِتگ ءُ بُرتگ اَنت۔ لشکر ءَ مدام زریپ بیھار داتگ ءُ آئی ءِ کھول ءِ آدگہ مردم ھم زوراکیانی نزانگ کُرتگ اَنت۔آئی ءِ کسانیں زھگ کہ نودربرے مدام پاکستانی لشکر ءَ وتی بنجل ءَ لوٹائینتگ۔یکبرے زریپ ءِ جند گوں وتی زھگ ءُ برات ءَ لشکر ءِ بنجل ءَ شُتگ کہ وتی بے میاری ءِ پیش بہ کنت ءُ وتی کھول ءَ چہ اے زوراکیاں بہ رکین ایت بلے بے سوب بیت۔چہ ھمے زوراکیانی سْوب ءَ آئی ءِ زھگ کانودی بنیاد ءَ درانڈیھ ءَ شُتگ ءُ مُزوری کنگ ءَ اِنت۔ چہ ھمے زوراکیانی سْوب ءَ شھید زریپ ءَ وتی کاروبار بند کُرتگ۔ بلوچستان ءَ ھرکس ھمے زوراکیانی دیمپان اِنت۔ بلے شھید زریپ ءِ زوراکیانی آماچ بیگ ءِ کسہ آسر بیت،27 دسمبر ءِ شپ ءِ نوہ ءَ پاکستانی لشکر آئی ءِ گس ءَ بیڑ بارت ءُ آئی ءَ کھول ءِ دیم ءَ آوار جنت،میتگ ءِ آدگہ لوگاں مان بیت،رپیک ء موسا ءُ میار ء مولابکش نامیں مردمے ءِ وائی ءَ بارت ءُ آیاں ھم زوراکی ءِ نشانگ کنت۔
آئی ءَ گْوشتگ کہ 27 دسمبر ، 2024 ءِ روچ ءَ زریپ ءِ لاش ءَ ھمساھگانی لوگ ءِ کش ءَ دست کپ ایت۔کہ آزار داتگ ءُ کُشتگ ءُ زبان ھم بُر اِتگ۔آئی ءِ جان ءَ زوراکی ءِ نشان ھم گندگ بنت۔کھول پولیس ءِ کِر ءَ روت کہ میاربارانی نام ءَ ایپ آئی ءَ بہ کنت بلے پولیس ایپ آئی نہ کنت۔کھول لاش ءَ زور ایت ءُ تربت ءَ روگ ءَ بیت کہ لاش ءِ ھژدری چار ءُ ٹپ ءَ بہ کنائین ایت بلے پاکستانی لشکر دُرسیں راہ ءُ دراں بند کنت ءُ کھول ءَ لاچار کنت کہ لاش ءَ کل بہ کنت۔
آئی ءَ گْوشتگ کہ اے ماہ ءَ بیست ءُ دو مردم زور بیگواہ کنگ بیتگ۔ زوربیگواھی یک گالبندے کہ ایشی ءِ بزانت پہ ما ھمیش اِنت کہ پاکستانی لشکر ءِ چیریں آزارجاھاں مردم بند اَنت۔بزاں اے ماہ ءَ چہ سرجمیں بلوچستان ءَ پاکستانی لشکر ءَ 22 مردم آوار جتگ ءُ وتی چیریں آزارجاھاں بند کُرتگ اَنت۔آیانی زندگ بیگ ءُ جان دُراھی ءِ بابت ءَ کھولاں ھچ سرپدی دیگ نہ بیت۔اے بندیگجاہ بلوچستان ءَ کورچات اَنت کہ ھمک ماہ درزنانی کچ ءَ مردماں ایر تِنگ اَنت،چہ ایشاں باز مردم ءِ ھال پد ءَ نہ ایت۔لھتیں زندگیں لاشانی دْروشُم ءَ یل کنگ بیت،لھتین ءِ ژانگولیں لاش چگل دیگ بیت۔
کازی ریھان ءَ گْوشتگ کہ گْوستگیں سال ءِ گُڈی ماہ ءَ زریپ ء اومر ءَ ھوار پنچ لاش چگل دیگ بیتگ۔سَے بلوچ سرمچار کوہ ءَ چہ پاکستان ءِ ڈرون اُرشاں شھید بیتگ۔اے جُھدکارانی کوش ءَ بلوچ راج موتک نہ کنت،بلے اے ھون پہ ھک، برابری ءُ آجوئی ءَ ریچگ بیگ ءَ اَنت۔اے گپ ءَ ما تچک کنگ لوٹ ایں کہ اے مردماں کہ پاکستانی لشکر ناشرکار گْوش ایت ءُ شھید کنت آ پہ وتی سرڈگار، راج ءُ راجی ھستمان ءَ جنگ کنگ ءَ اَنت۔ اگاں پاکستانی لشکر ءِ زورگری مہ بیت گڑا اے کُشت ءُ کوش ھم نہ بیت۔اے گرانبھائیں جان زورگری ءِ سْوب ءَ ندر بیگ ءَ اَنت۔ پمشکا ما ’ پانک ‘ ءِ رپورٹ ءِ تہ ءَ اے چیزاں نبشتہ کن ایں کہ اے زوراکی ھم پمشکا برجاہ اِنت۔6 دسمبر ، 2024 ءَ نوید ء ھمید جھمنند گلی بلیدہ شھید کنگ بیتگ اَت۔14 دسمبر چہ پاکستانی لشکر ءِ ڈرون اُرش ءَ ابدُلمجید ء براھیم جھمنند ھدابادان پنجگور ، ذاکر ء ابدُلرزاک جھمنند پسنی گوادر ، دلجان ء نذیر جھمنند پنجگور شھید بیتگ۔
آئی ءَ گْوشتگ کہ پاکستانی لشکر ءَ باز میتگانی سر ءَ اُرش کُرتگ،گوادر ءِ ھند جیمڑی، پانوان ءَ لشکر ءَ بیڑ بُرتگ ءُ داں بیست ءُ چار اَداراں مردم انَگِر کُرتگ ءُ ھشت مردم آوار جتگ ءُ بُرتگ۔چہ ایشاں لھتیں مردم یل بیتگ ءُ لھتیں انگت بیگواہ۔اے بلوچستان ءِ جاور اَنت کہ مردم پہ وتی مردمانی پد جنگ ءَ زھرشانی کنگ ءَ اَنت۔ وی بی ایم پی ءِ چیردستی ءَ جھان ءِ دراج کشیں زھرشانی ھم بلوچستان ءِ بنجاھی شھر شال پریس کلب ءِ دیم ءَ برجاہ اِنت۔پانزہ سال اِنت کہ زھرشانی برجاہ اِنت بلے پانزھیں سالانی تہ ءَ زوربیگواھی ھلاس کنگ ءِ جاہ ءَ گیش کنگ بیتگ۔
آئی ءَ گْوشتگ کہ بلوچستان ءِ باھوٹیانی بگیری ءَ پاکستانی چیریں داراھانی دریڈھیاں کاروائی آئی ءِ میارباری ءِ بھر اَنت۔بلے وھد ءِ ھمراھی ءَ اے کاروائی تیز کنگ بیتگ اَنت۔ھنچوش کہ انوں چہ وزیرستان ءَ لڈ ءُ بار کُرتگیں مردمانی سر ءَ کہ اوگانستان ءِ پکتیا ءَ پاکستانی لشکر ءَ اُرش کُرتگ اَت،چل ءَ گیش بے میاریں مردم مُرتگ اَت کہ آیانی تہ ءَ زھگ ءُ جنین ھم ھوار اَت۔ھمے وڑ ءَ جنوری 2024 ءَ پاکستانی لشکر ءَ روکپتی بلوچستان ءِ ھند شمسر ءَ میزائل اُرشے کُرتگ اَت کہ چہ ایشی ءَ بلوچ نیشنل موومنٹ ( بی این ایم ) ءِ راجمان پتر ءِ باسک دوستا مھمود گوں دہ مردماں شھید بیتگ اَت کہ آیانی تہ ءَ کسانیں زھگ ءُ جنین ھوار اَت۔ما رسانکدر ءَ اے ھال شنگ کُرتگ اَت بلے بژن کہ میان استمان ءَ اے باروا پاکستان جُست کنگ نہ بیتگ کہ بایدیں جُست کنگ بوت ایں۔
آئی ءَ گْوشتگ کہ اوگانستان ءَ پشتون باھوٹیانی کُشگ ءَ ما گوں پشتون راج ءَ دلپدردی درشان کن ایں ءُ پاکستانی لشکر ءَ کہ اوگان سرڈگار ءِ سر ءَ اُرش کُرتگ ما ایشی ءَ دزمانجی یے سر پد بہ ایں کہ اے میان استان ءِ راھبندانی بگیری ءُ اوگانستان ءِ سر ءَ اُرش کنگ اِنت۔پاکستان وتی لشکری زور ءِ بنیاد ءَ ھمساھگیں ڈیھاں ایردست کنگ لوٹ ایت۔اوگانستان ءَ کہ پاکستان وتی پنچُمی اوستان کنگ لوٹ ایت اے مارشت آئی ءِ لشکری واک ءِ زھن ءَ ھست اِنت ءُ ھر وھد ءَ کہ آیاں موہ رس اِتگ اے گپ اِش جتگ۔اوگانستان ءِ جیڑہ ءُ اود ءِ نزام ءِ مَٹ کنگ ءَ پاکستان ءِ دزمانجنی کنگ چہ کس ءَ چیر نہ اِنت۔ پاکستان اوگانستان ءَ وتی وتگڑیں سرکارے آرگ ءُ وتگڑیں سیمسر ڈیورنڈ لائن ءِ جیڑہ ءَ وتی ھک ءَ کنگ لوٹ ایت۔ بلے انیگیں اوگان سرکار ءِ واھگ ستا کرز اَنت کہ آئی نہ ایوک ءَ باھوٹیانی پھریزگ ءِ وتی شوندات برجاہ داشتگ بلکیں جھان ءِ دیم ءَ اے گپ ایر کُرتگ کہ اوگانستان ءَ نشتگیں باھوٹی ایردست کہ چہ پاکستانی لشکر ءِ زوراکیاں چہ وتی ڈیھاں درکپتگ ءُ اوگانستان ءَ نشتگ اَنت۔ما ھمے اوست ءَ دار ایں کہ اوگانستان وتی راھبندانی پاسداری ءَ کنت ءُ باھوٹیانی پھریزگ ءَ وتی کِرد ءَ پیلو کنت۔
کازی ریھان ءَ گْوشتگ کہ پاکستان ءَ اود ءَ اُرش کنگ ءَ پد ھرچی کہ گْوشتگ اَت جھان ءَ ھم زانت کہ دروگ بندگ ءَ اِنت ءُ آیاں اے گپ ھم گْوشتگ اَت کہ اے اُرش ءَ بے میاریں مردم ،جنین ءُ زھگ کُشگ بیتگ اَنت کہ اے مردم اوگانستان ءِ میار بیتگ اَنت۔ اگاں پاکستان پہ وھد گِر ءُ دار کنگ مہ بیت گڑا اوگانستان ءِ تھی جیڑھانی سر ءَ نپ زورگ ءِ جُھد ءَ کنت۔باھوٹیانی سر ءَ بمبگواری کنگ ءُ دمگ ءَ وتی سرکشی ءِ برجاہ دارگ ءِ جُھد ءَ کنت۔ پاکستان نہ لوٹ ایت کہ اوگانستان مھکم بہ بیت ءُ پہ دمگ ءِ ایمنی ءَ تُرسناک اِنت۔
جارکش ءَ گْوشتگ کہ پاکستان گوں تُرندی ءَ سلکار،باڑھی چریک ءُ منشیات پروشانی کمک ءَ بلوچ باھوٹیانی سر ءَ اُرش کنت۔لوگانی سر ءَ دستی بمب چگل دے اَنت ءُ مردماں کُش اَنت۔پہ اے چیزانی گر ءُ دار کنگ ءَ المی اِنت، چی ءَ کہ اے ھماردم اَنت کہ چہ پاکستانی ءِ زوراکیاں دراتکگ ءُ ھمساھگیں ڈیھاں شُتگ ءُ نشتگ اَنت۔اے بلوچ راج ءِ ھک اِنت کہ ھمساھگیں ڈیھ آیاں ھمساھگی ءِ بنیاد ءَ کمک بہ کن اَنت ءُ جاگہ بہ دے اَنت۔مرچی سک باز بلوچ باھوٹی چہ وانگ، جان دُراھی،روزگار ءُ سپراں شُت کُرت نہ کن اَنت۔چہ پجار کارت ءِ نہ بیگ ءِ سْوب ءَ بازیں جنجالانی دیمپان اَنت۔ما لوٹیں کہ بلوچ باھوٹیانی جیڑہ جھان ءِ دیم ءَ پدر بہ بیت ءُ آ ساٹگ ءُ پھریزگ بہ بنت۔
آئی ءَ گْوشتگ کہ بلوچستان ءِ جاور ناگیگ اَنت ءُ پاکستامنج ریاست ءَ پہ بلوچ راج ءَ انساپ ءِ دُرسیں در بند اَنت۔پمشکا ما وتی ھمساھگیں ڈیھ ءُ چہ آدگہ ڈیھاں انسانی بنیاداں کمک ءِ واھگدار ایں داں کہ ما وتی آجوئی ءَ پد ءَ بگریں۔
آئی ءَ گْوشتگ کہ بلوچ راج پہ وتی آجوئی ءَ دیمونی دیگ ءَ اِنت ءُ بلوچ ءَ ھچ زوراک داشت نہ کنت۔بلوچستان ءَ زورگر ءِ بگیری ءَ ھرچ پِڑ ءَ جُھد برجاہ بیت۔بی این ایم وتی راھبند ءِ رد ءَ آجوئی جُھد ءِ تہ ءَ دیم ءَ بیت ءُ وتی کِرد ءَ پیلو کنت۔
آئی ءَ گْوشتگ کہ ما گوں نوکیں سال ءَ ھمے کول ءَ کن ایں کہ ما آجوئی جُھد ءَ برجاہ دار ایں،بلوچ سرڈگار مئے جُھد ءِ بُندر اِنت ءُ بُندر بیت۔بی این ایم ءِ گلزمین ءُ درانڈیھ ءَ نشتگیں باسک وتی لیکہ ءُ کِرد ءَ تیز بہ کن اَنت ءُ بلوچستان ءِ ھرچ کُنڈ ءَ آجو جُھد ءِ کلوہ ءَ سر بہ کن اَنت۔
