بلوچ یکجھتی کیمیٹی ( بی وائی سی ) ءَ ماں رسانکدر ءَ وتی شنگ کرتگیں درشانے ءَ گوشتگ که دسمبر ءِ ماہ ءَ پاکستانی لشکر ءَ دُکی ءُ ھرنائی ءِ ھواری ءَ جتا جتائیں جاھاں زوراکی کرتگ ءُ باز بلوچ آوار جتگ ءُ بیگواه کرتگ۔
آئی ءَ گوشتگ که پاکستان ءِ ریاست ءِ زوراکی بلوچستان ءِ دوریں ھند ءُ دمگاں گوں ترندی ءَ برجاه اِنت بلے آئی ءِ زوراکی دامگ ءُ رھوتی سسٹم ءِ نه بوگ ءِ سوب ءَ چاگردی رسانکدراں اَبید انسانی ھکانی جھانی گلاں ھم سر بوگ ءَ نه اَنت۔
بی وائی سی ءَ گوشتگ که دکی ءَ پاکستانی لشکر ءَ زوراکیانی میان ءَ یکیں کھول ءِ سیدمھمد مری ، ابدل نبی مری ءُ ھیرمھمد مری ءَ هوار باز مردم آوار جتگ که انگت ءَ بیگواه اَنت۔ ھمے کھول ءِ ھسین بکش ء سیدمھمد مری چه ھرنائی ، پیرساھب ءِ چوکی ءَ سپر ءِ میان ءَ آوار جنگ ءُ بیگواه کنگ بیتگ۔ ھمے وڑ ءَ گل مھمد مری، امران مری ، شیرمھمد مری ءُ سپرھان مری پاکستانی لشکر ءِ دست ءَ ھرنائی ءَ لشکرکشی ءِ میان ءَ زوربیگواه کنگ بیتگ اَنت ءُ چه آیاں اَبید دگه باز مردم ھم آوار جنگ بیتگ که آیانی نام انگت ءَ مارا سر نه بیتگ۔ دکی ءُ ھرنائی ءَ پاکستانی لشکر ءَ شانزده مردم آوار جتگ ءُ بیگواه کرتگ۔
آئی ءَ گوشتگ که بلوچستان ءَ ریاست ءِ زوراکی نوکیں گپے نه اِنت۔ریاست ءِ دست ءَ بلوچانی گسانی ماندارگ، دلوتانی پُلگ ، مردمانی لٹ ءُ شاپ کنگ، ماں چوکیاں آیانی سر ءَ زوراکی کنگ ، آیانی بیگواه کنگ ءُ لاشانی چگل دیگ ھر روچ گندگ بوگ ءَ اِنت۔ ریاست ءِ دست ءَ بلوچستان په رسانکدراں یک تھاریں چاتے جوڑ کنگ بیتگ ءُ بلوچستان ءِ زوراکیانی گپ انسانی ھکانی جھانی گلاں ابید بلوچستان ءِ وتی مردماں ھم سر بوگ ءَ نه اَنت۔ سرکار ءَ په وتی زوراکیانی چیر دیگ ءَ دامگ بستگ ءُ مردماں چه توار چست کنگ ءَ نیلگ ءَ اِنت۔سرکار زوربیگواھیں مردمانی کھولاں ماں رسانکدر ءَ توار چست کنگ ءُ زھرشانی ءِ موکل ءَ نه دیگ اِنت بلے آئی ءِ وتی رسانکدر زوریبگواھی ءِ کیساں دگہ پیم پیشدارگ ءُ مردماں گیش دلپدرد کنگ ءَ اِنت۔
بی وائی سی ءَ گوں انسانی ھکانی گلاں لوٹ کرتگ که په دکی ءُ ھرنائی ءِ زوربیگواھیں مردماں وتی کِرد ءَ پیلو به کن اِت۔
آئی ءَ گوشتگ ما گوں بلوچ راج ءَ دزبندی کن اِیں کہ زوربیگواھی ءِ بگیری ءَ تپاک به بنت ءُ ھر کجا که اِے وڑیں ویلے بیت آئی ءِ بابت ءَ توار چست به کن اَنت. بی وائی سی ءَ گوں زوربیگواھیں مردمانی کھولاں لوٹ کرتگ ءُ گوشتگ وتی مردمانی زوربیگواهی ءِ گپ ءَ رسانکدر ءَ شنگ به کن اِت ءُ توار چست کن به کن اِت۔
