بلوچ اسٹوڈنٹس ایکشن کمیٹی پنجگور ھنکین ءِ دیوان ھنکین ءِڈپٹی آرگنائز اکتر ءِ سروکی ءَ برجم دارگ بوتگ۔ دیوان ءِ گچینی مھمان بنجاھی پتر ءِ باسک آمر ءُ سلیم بوتگ اَنت۔ دیوان ءَ جتائیں بنگپ کہ آیانی تہ ءَ بنجاھی سرکیولر، گوستگیں ھنکین ءِ اھوال، شرگداری، گَل ءِ کار، ھندی ءُ میان استمانی سیاسی جاور ءِ سرءَ گوں دلجمی ءَ باوست ءَ پد آؤکیں گامگیج ءِ سرھال ءَ پیسری آرگنائزنگ باڈی ھلاس کنگ ءُ پہ نوکیں کابینہ ءَ سنگت گچین کنگ بوتگ اَنت۔
دیوان ءَ بنجاھی سنگتاں پنجگور ھنکین ءِ گوستگیں کارمستر نمیرانیں تاھر ءَ دروت ندر کنان ءَ گوْشتگ کہ گل ءَ نمیرانیں تاھر ءِ وڑیں نہ تُرس، کمیٹڈ ءُ تمردیں ورنایانی درکار اِنت کہ آ گل ءِ کار ءُ پروگراماں وتی زمہ واری سرپد بہ بنت ءُ شپ روچ پہ گل ءِ دیمروئی ءَجھد کن اَنت۔ اے تاھر ءِ وڑیں ورناھانی برورد بوتگ کہ یک کسانیں وھدے ءَ جتائیں جیڑہ ءُ اڑانداں ابید گل ءِ پنجگور ھنکین جوانیں رنگے ءَ دیم برتگ۔ بژن اِنت کہ تاھرءِ ڈولیں ورنا مئے میان ءَ ساڑی نہ اَنت بلے آیانی پگر ءُ پلسپہ مدام بلوچ ورناھانی رھشونی ءَ کن اَنت۔
آیاں دیمتر ءَ تران کرتگ ءُ گُوْشتگ کہ پنجگور ءَ پہ نودربر سیاست ءُ وانگی چاگردے ءِ برجاہ دارگ ءَ جتائیں ٹولی سرکار ءِ سروکی ءَ کار کنگ ءَ اَنت ءُ مزنیں مدتے بیت کہ ادءَ دین ءِ نام ءَ ترس ءِ چاگردے جوڈ کنگ بیتگ بلے اے میان ءَ گل پروگرام ”سبا لٹریری پسٹیول پَنجگُور ءِ اڈ دیگ، بلوچ لٹریسی کیمپئن ءِ سرءَ دلجمی ءَ کار، بلوچستان کتاب کاروان ءِ دروشم ءَ کتاب دود ءِ دیمءَ برگ ءُ گَل ءِ نیمگ ءَ چہ چاپ بوتگیں زھگانی تاک گام ءِ پروم ءِ وانگجاھانی تہ ءَ وانینگ مزنیں سوبمندی اَنت۔
آیان دیمترءَ تران کنان ءَ گوْشتگ کہ بلوچستان ءِ سیاسی جاور روچ پہ روچ مٹ بوان اَنت، ما ھمے چاگردءِ تہ ءَ سیاست کنگ ءَ ایں ءُ اے گپ تچک اِنت کہ کش ءُ گوْرءِ جاورانی سان گَل ءِ سرءَالم کپ اَنت بلے مارا وتی باسکانی میان ءَ ادارہ جاتی سوچ مھکم کنگی اِنت داں ہر وڑیں جاوراں پَنجگُور ءِ ھند ءُ دمگاں گل ءِ کار ءُ پروگرام برجاہ دارگ بہ بنت۔ سیاسی گلے ءِ بستار ءَ مارا وتی پالیسی لانگ ٹرم بنیات ءَ گشینگی اَنت داں آھوکیں وھداں گل نودربرانی رھشونی ءَ بہ کنت ءَ بلوچ جُنز ءَ مھکمیں کارکن دات بہ کنت۔
جتائیں بُنگپانی سرءَ گپ ءُ تران ءَ پد دیوان ءِ گُڈی بنگپ آؤکیں گامگیج ءَ گوستگیں آرگنائزنگ باڈی ھلاس کنگ بوتگ ءُ پہ نوکیں کابینہ ءَ سنگت گچین کنگ بوتگ اَنت۔ نوک گچین بوتگیں کابینہ ءَ نسرت ھنکین ءِ کارمستر، آئشہ بکمک کارمستر، اکتر کارگُشاد، زید کُمک کارگشاد ءُ برمش رسانکدری کارگشاد گچین کنگ بوتگ اَنت۔
گڈی ءَ سوگندی بھر ءَ بنجاھی سنگت ءَ نوک گچین بیتگیں کابینہ سوگند داتگ ءُ دیوان ءِ ھلاسی جار جنگ بوتگ۔
