شال:دو شمبے ءِ روچ ءَ بلوچ یکجھتی کمیٹی ءَ شھید زریب ءُ شھید نوید ءِ ناھکیں کوش ءِ بگیری ءَ روانکے کش اِتگ۔جنین ءُ زھگاں ھوار مردماں بازیں کچے ءَ بھر زُرتگ۔
زھرشانی روانک ءَ ڈاکٹر مھرنگ،سبگت اللہ ءُ زوربیگواھیں مردمانی کھولاں تران کُرتگ ءُ گْوشتگ کہ مردمانی بے توار بیگ ءِ سْوب ءَ اے وڑیں وئیل مدام بنت، ما مدام گْوشتگ کہ بے توار مہ بہ اِت۔مرچی من ءَ پد ءَ ھمے گپ ءَ گْوش ایں کہ بے تواری مئے مرگ ءِ سْوب جوڑ بیت، بلوچ راج اے دردناکیں وئیل ءِ بگیری ءَ ھمتوار بہ بیت ءُ گھگیری بہ کنت۔
آیاں گْوشتگ کہ ما ھمے لوٹاں کن ایں کہ زوراکیانی آماچیں مردم انساپ دیگ بہ بنت، بلے ریاست مردماں انساپ نہ دنت بلکیں آیاں تُرسین ایت ءِ بیھار دنت کہ بے توار بہ بہ اِت۔
آیاں گْوشتگ کہ کچ ءُ ھب ءَ نشتگیں مردم لشکری کارمنداں بیھار داتگ اَنت، وھدے کہ مردم پاد نیاتکگ اَنت گڑا لشکری کارمنداں ھب چوکی ءَ مردم زوراکی ءِ نشانگ کُرتگ اَنت۔
آیاں گْوشتگ کہ شھید زریپ ءُ شھید نوید کہ بلیدہ ناھک ءَ شھید کنگ بیتگ، اے دوئیں وئیلانی پٹ ءُ پول کنگ ءُ میاربارانی نام ءَ ارزی نبشتہ کنگ ءُ جُست کنگ بہ بنت کہ آیاں کے اے ھک داتگ کہ ناھک ءَ مردماں بہ کُش اَنت۔
