بلوچ لیبرشن آرمی ءِ جارکش آزاد بلوچ ءَ رسانکدر ءَ شنگ کرتگیں درشانے ءَ جیمڑی ءِ ھند گنز ءُ پانوان ءَ پاکستانی لشکر ءِ سر ءَ دو جتائیں اُرشانی زمه واری من اِتگ.
جارکش ءَ گوشتگ مئے سرمچاراں 29 دسمبر ءَ روچ ءِ اَدار یک ءَ بلوچستان ءِ تیاب دپی شھر جیونی ءِ ھند گنز ءَ پاکستانی لشکر ءِ کارمندانی سر ءَ بمب اُرشے کرتگ که چه ایشی ءَ دو کارمند جاهی مرتگ ءُ سئیمی کارمند سکا ٹپی بیتگ ءُ آئی ءَ ھما وھد ءَ که نادراهجاه ءَ برگ ءَ بیتگ اَنت مرتگ.
آئی ءَ گوشتگ گنز ءِ اُرش ءَ پد پاکستانی لشکر ءِ چار گاڑیانی کاروانے چه بنجل ءَ درکپتگ ءُ دیم په اُرش جاه ءَ روگ بیتگ که پانوان، لانڈو زوگر ءَ آیانی کاروان ءِ سر ءَ بمب اُرشے کرتگ. چه ایشی ءَ پاکستانی لشکر ءِ یک کارمندے مرتگ ءُ پنچ ٹپی بیتگ.
آئی ءَ اُگوشتگ جیمڑی ءَ لھتے وٹگڑیں مردم ھست اَنت که په وتی زاتی سیتّ ءُ نپانی ھاتر ءَ زورگریں لشکر ءِ کمکارے ءُ پله مرزی ءَ ھوار آیاں آپ ءُ سامان ھم سر کنگ ءَ اَنت مئے چم آیانی کارانی سر ءَ سک اَنت ءُ آیاں گندگ ءَ اِیں.
آزاد بلوچ ءَ دوئیں اُرشانی زمه واری من اِتگ ءُ گوشتگ ھما مردم که زورگریں لشکر ءِ کمکارے ءَ کنگ ءَ اَنت آیاں کڈن کن اِیں ءُ گوش اِیں چه لشکر ءِ وپا داری ءُ پله مرزی ءَ پھریز به کن اِت اگاں ناں ما آیاں راجی میاربار سرپد به اِیں ءُ آیانی بگیری ءَ گامگیج زور اِیں. بی ایل اے یک راجی لشکرے ءِ بستار ءَ اِے ھک ءَ دار ایت که اِے وڑیں کارانی بگیری ءَ کاروائی به کنت.
