شال: ابدُلرھمان مری ءِ کھول ءِ رد ءَ ابدُلرھمان مری 13 جنوری 2015 ءَ چہ ھزارگنجی شال ءَ مری کیمپ ءَ سی ٹی ڈی ءَ دزگیر کُرتگ ءُ سریاب ءَ پولیس تانہ ءَ بند کُرتگ۔
آئی ءِ گْوشگ اِنت کہ پد ءَ زوت یل کنگ ءُ یک روچے ءَ رند پد ءَ پہ جُست ءُ پُرس ءَ لوٹائینگ بیتگ، داں دو روچ ءَ تانہ بند کُرتگ، چہ تانہ پد ءَ پاکستانی چیریں ادارھانی کارمنداں بُرتگ، ھما اِنت کہ بیگواہ اِنت۔
کھول ءِ گْوشگ اِنت کہ ما دو سَے رند ءَ تانہ ءَ شُتگیں بلے پولیس گوں ما گپ ءَ تیار نہ اِنت، ما گوں آیاں گْوشتگ کہ اگاں ابدُلرھمان ءَ میارے ھست گڑا آئی ءَ سزا بہ دے اِنت بلے شُما پھک بیگواہ کُرتگ، ما نہ زانیں کہ زندگ اِنت اگاں مُرتگ۔
کھول ءَ چہ انسانی ھکانی گل، سیاسی ءُ چاگردی کارکن ءُ جھان ءَ لوٹ کُرتگ کہ پہ ابدُلرھمان ءَ توار چِست بہ کن اِت، داں ریاست آئی ءَ دیم ءَ بیار ایت۔
