تُربَت: تمپ ءَ پاکستانی لشکر ءِ دست ءَ ناھک ءَ کُشگ بوتگیں زریپ ءِ لاش ءِ کل کنگ ءِ پیسلہ کرتگ۔ آسیا آباد ءُ تُربَت ڈی بلوچ ءَ پہ آئی کھول ءِ انساپ دیگ ءَ زھرشانی ننداک برجاہ بنت۔
بنشون ءِ رد ءَ پاکستانی لشکر ءَ پہ زور شھدگ ءِ پچ کنگ ءَ زھرشانی ءَ نشتگیں زھگ ءُ جنینانی سر ءَ زوراکی کرتگ۔ بلے زھرشانی کنوک پاکستانی لشکر ءِ زوراکیاں ابید پہ انساپ ءِ لوٹ ءَ زھرشانی ءَ نشتگ اَنت۔
چوش کہ بلوچ یکجھتی کمیٹی ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ چہ پاکستانی لشکر ءِ زوراکی ءُ بیھاراں زریپ ءِ کھول آئی لاش ءِ کل کنگ ءَ لاچار بیتگ۔
آئی گوشتگ کہ زریپ ءِ کھول ءَ اے رستری ءِ بگیری ءَ گھگیری کرتگ۔ زریپ ءِ لاش ءَ پہ ھژدری چار ءُ ٹپاس ءَ تُربَت ءَ برگ ءَ بوتگ اَنت ءُ آئی ناھکیں کوش ءِ بگیری ءَ آیاںانساپ ءِ لوٹ کرتگ۔ آئی کھول ءُ تمپ ءِ مھلوک پاکستانی لشکر ءَ تُربَت ءَ روگ ءَ نہ اِشتگ انت۔ پاکستانی لشکر ءَ زریپ ءِ لاش چہ کھول ءَ زورگپتگ ءُ داشتگ دوشی این اِنت کہ کھول زھرشانی ءَ نشتگ کہ انگت زھرشانی برجاہ اِنت۔
آئی گوشتگ کہ چوش کہ پاکستانی لشکر ءَ وتی زوراکی ءِ چیر دیگ ءِ جھد ءَ زریپ کشتگ آئی کھول پہ زانت دارگ بوتگ ءُ تُربَت ءَ روگ ءَ نہ اشتگ اَنت۔ لاش پہ ھژدری چار ءُ ٹپاس کنگ ءَ نیشتگ، پاکستانی لشکر مردماں کُش ایت ءُ پد ءَ مردماں بے توار کنگ ءِ جُھد ءَ کنت۔
آئی گوشتگ کہ بی وائی سی ءِ جھد کاراں ءُ تُربَت ءِ جھمنندیں مردماں ڈی بلوچ ءَ زھرشانی ءَ شھدگ بند کرتگ۔ پولیس ءَ آیاناں بیھار داتگ ءُ ترسینتگ۔ دومی نیمگ ءَ تمپ ءِ مردماں اے زوراکی ءِ ایرجنگ ءَ تھتگ بند ھرتال کرتگ۔
آئی گوشتگ کہ پاکستانی چُکچینی کنوکیں ادارہ ھر روچ بلوچاں آوار جنگ ءُ کُشگ ءُ دور دیگ ءَ اَنت۔ وھدے کہ کھول انساپ ءِ لوٹ ءَ کن اَنت آیاں پہ زور بے توار کن اَنت ءُ بیھار دینت۔ انچوش گوں زریپ ءُ آئی ءِ کھول ءَ کنگ بوتگ۔
آئی گوشتگ کہ زریپ ءِ کھول ءَ نوں آئی کل کنگ ءِ پیسلہ کرتگ کہ آئی لاش ھراب بوگ ءَ بوتگ۔ بلے داں کھول ءَ انساپ دیگ مہ بیت زھرشانی برجاہ بیت۔ بی وائی سی گوں کھول ءِ ھمراہ اِنت ءُ دیمتر ءِ بابت ءَ راج ءَ سرپدی دئیں۔ وھدے کہ پاکستانی لشکر ءِ دست ءَ مئے مردم بے دردی ءَ کشگ بوگ ءَ اَنت ما بے توار بوت نہ کن ایں۔
