کولواہ: بلوچ وومن پورم ءِ نیمگ ءَ شھید بانک کریمہ ءِیات ءَ مراگشانی درچ ءَ پنچ شمبے ءِ روچ ءَ ڈنڈار ءَ مراگشے برجم دارگ بیتگ۔ مراگش ءَ ڈنڈار ءِ کِر ءُکشانی ھندانی مردماں بازیں کچے ءَ بھر زرتگ۔
مراگش ءَ بلوچ وومن پورم ءِ سروک ڈاکٹر شلی ءَ تران کرتگ ءُ گوشتگ کہ تمپءَ چہ بانک کریمہ ءَ ابید مزنیں کچے ءَ مردم ھست بلے ما بانک کریمہ ءَ پمشکا یاد کن ایں بانک کریمہ بلوچ ءِ ھما جنک بیتگ آئی وتی زند ءِ درسیں واھشت کشتگ اَنت ءُ وتی سرجمیں زند پہ بلوچ راج ءَ ندر کرتگ۔
آئی ءَگوشتگ کہ ما اد ءِنندوکیں مردماں گوشگ لوٹ ایں کہ شما وت ءَ گوں بانک کریمہ ءَ بندوک بہ کن اِت۔ بانک ءَ تھنایک روچے ءَ یاد مکن اِت بلکیں بانک ءَ وتی ھیالانی تہ ءَ جاگھ بہ دے اِت ءُپہ مدامی یاد بہ کن اِت۔ گڑا ما ھمک گام ءَجنزاں بہ ایں گڑا وتی راجی بامرداں یاد بہ کن این ءُ آیانی دیستگیں واب ءَ پیلو بہ کن ایں۔
ڈاکٹر شلی ءَ گوشتگ کہ اے جھد تیوک ءَ بانک کریمہ ءِ کوپگ ءَ نہ بوتگ، اے جھد تیوک ءَ ھما مردمانی کوپگ ءَ نہ اِنت کہ در کپتگ اَنت،اے یک راجی جھدے مارا درساں ھوار بوگی اِنت۔ مارا ھمے پیش دارگی اِنت ما نوں ایردست نہ بہ ایں، ھما واب کہ مئے راجی شھیداں دیستگ آ واب مارا پیلو کنگی اِنت۔ ما اد ءِ نشتگیں مردم وتی زمہ واریاں پیلو بہ کن ایں گڑا وتی گڈی منزل ءَ سر بہ ایں۔ پہ منزل ءَ سر بوگ ءَ مارا وتی زاتی واھشت کشگ لوٹ اَنت۔
