کیچ: 16 دسمبر 2024 ءَ دمگی چئیرمین ھوتمان ءِ دست ءَ زور بیگواہ کناھینگ بیتگیں ورنا زمان جان ء سپاھان ءُ ابدُلھسن ء رھمت ءِ کھول ھوشاپ ءَ سی پیک دگ ءَ زھرشانی ءَ نشتگ۔
زھرشانی ءَ کھول ءَ ھوار آدگہ ھندی مردماں بازیں کچے ءَ بھر زرتگ ءُ نشتگ اَنت۔ دگ ءِ بند بوگ ءِ سوب ءَ دوئیں نیمگاں گاڑی اوشتاتگ اَنت۔
کھول ءِ گوشگ اِنت کہ زمان جان ءُ ابدُلھسن ءِ گون ءَ مئے کھول ءِ دگہ التاپ نامیں ورنایے ھوتمان ءَ وتی گس لوٹائینتگ ءُ پد ءَ ریاستی ادارھانی دست ءَ داتگ اَنت۔ التاپ آجو بیتگ ءُ زمان جان ءُ ابدُلھسن انگت بیگواہ اَنت۔۔
آیاں لوٹ کرتگ ءُ گوشتگ کہ سرکار پہ مئے زھگانی آجوئی ءَ گامگیج بہ زور ایت ءُ مئے زھگ زوت یل کنگ بہ بنت، دانکہ زمان جان ءُ ابدُلھسن یل کنگ نہ بیتگ اَنت ما وتی زھرشانی ءَ برجاہ دار ایں۔
چوش کہ زمان جان ءُ ابدُلھسن ءِ زوریں بیگواھی ءِ بگیری ءَ کھول ءَ 20 دسمبر ءَ پریس کانپریس ھم کرتگ اَت ءُ سے روچ ءِ وھد داتگ اَت، سے روچ زی ھلاس بیتگ کھول ءَ مرچی زھرشانی ءَ سی پیک دگ بند کرتگ۔
