تربت: بیگواھیں زمان ءُ ابدُلھسن ءِ کھول ءَ تربت پریس کلب ءَ پریس کانپریس کرتگ ءُ گوشتگ کہ مئے کھول ءِ سے مردم زمان، ابدُلھسن ءُ التاپ ءَ دمگی چئیرمین ءَ دو روچ پیش ریاستی ادارھانی دست ءَ داتگ التاپ دوشی یل کنگ بیتگ ءُ زمان ءُ ابدُلھسن انگت بیگواہ اَنت۔
آئی ءَ گوشتگ کہ مئے مردم زوت یل کنگ بہ بنت اگاں کسے ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔ مئے سر ءَ بیتگیں زوراکیانی جست گرگ بہ بیت، چی ءَ کہ مئے کھول ءَ یکشل ءَ زوربیگواھی، ترسینگ، بیھار ءُ دروگیں بھتام جنگ بوگ ءَ اِنت۔ گوں آمیدگس ءُ چہ انسانی ھکانی گلاں لوٹ کن ایں کہ مئے کھول ءِ مردماں بہ پھریز اَنت ءُ ترسینگ ءُ بیھاراں بند بہ کن اَنت۔ دمگی چئیرمین ھوتمان ءُ آدگہ کارمندانی کارپدانی بابت ءَ پٹ ءُ پول بہ کن اَنت۔
آئی ءَ گوشتگ کہ اگاں مئے لوٹ داں سے روچاں منگ نہ بوت اَنت گڑا ما لاچاریں کہ زھرشانی کن ایں ءُ جتائیں جاھاں دگاں بند کن ایں۔
آئی ءَ گوں انسانی ھکانی گل ءُ سیاسی گلاں لوٹ کرتگ ءُ گوشتگ کہ مئے گوم ءَ ھمراھداری بہ کن اَنت۔ آمیدگس مئے کیس ءَ بزور ایت ءُ مارا انساپ بہ دنت۔ سرکار گامگیج بہ زور ایت ءُ مئے مردم گیش تاوان دیگ مہ بنت۔ ما ھمے اوست ءَ دار ایں شما مئے لوٹاں گوں سنگینی ءَ گوش دار اِت ءُ پہ مئے جیڑہ ءِگیشءُ گیوار کنگ ءَ زوت گامگیج زور اِت۔
