کیچ: تربت ءَ پہ زور بیگواھیں استاد واھد کمبر ءِ آجوئی ءَ زھرشانی روانکے کشگ بیتگ۔ روانک چہ اتا شاد ڈگری کالج ءَ درکپتگ ءُ شھید پدا اھمد چاراہ ءَ مچ بیتگ۔
استاد واھد کمبر پاکستانی چیریں ادارھاں چہ ایران ءَ بیگواہ کرتگ۔ چہ استاد واھد کمبر ءِ کھول ءِ نیمگ ءَ یک زھرشانی روانکے کشگ بیتگ۔
پہ استاد واھد کمبر ءِ آجوئی ءَ واجہ پروپیسر گنی پرواز ءَ تران کنان ءَ گْوشتگ کہ پہ انسانی ھکانی راجی جھد ءَ 1948 ءَ میان اُستمان ءَ رھبندے ٹھینتگ کہ آئی ءِ تہ ءَ انسانی بُنکی ھک ھوار اَنت۔ زندگ بیگ ءِ ھک،آجوئی ءِ ھک،درنگاز ءُ پہ وتی ھکاں زھرشانی، ھڑتال کنگ انسانی بُنکی ھک اَنت۔ اے دُرسیں ھک یک راجمستری استانے ءَ پیلو کنگ بنت۔ وھدے کہ یورپ ءُ لاتینی امریکہ ءَ انسان بیگواہ کنگ بیتگ اَنت گڑا آیاں اے کار ایرجتگ۔ 2001 ءَ من استاد واھد کمبر دیستگ، آ وھدی لشکری زوراکیں سرکار پرویز مشرپ ءِ وھد اَت۔ استاد واھد کمبر نودربری ءِ وھد ءَ بیگواہ کنگ بیتگ اَت بلے آمیدگس ءَ بے میار کرتگ اَت۔ پد ءَ آئی ءَ وتی راجی سیاست بندات کُت ءُ پد ءَ بیگواہ کنگ بوت۔ بلے بازیں جُھد ءَ پد آجو کنگ بوتگ اَت۔مرچی پد ءَ استاد بیگواہ کنگ بیتگ ءُ پاکستان ءَ وتی جند ءِ راھبند پروشتگ۔ من چہ راجی ءُ میان اُستمانی گلانی نیمگ ءَ لوٹ کناں کہ استاد واھد کمبر ءَ آجو بہ کن اِت۔
ھمے میان ءَ استاد واحد کمبر ءِ گھارزتک ماھکان بلوچ ءَ پہ استاد ءَ شَیرے ونتگ۔ چہ ایشی ءَ پد گار ءُ بیگواھیں استاد واھد کمبر ءِ کستریں جنک مھلب ءَ وتی ھیال درشان کرتگ اَنت ءُ گوشتگ کہ استاد واھد کمبر تھنا منی پت نہ اِنت بلکیں آ بلوچ راجی رھشونے، آئی ءَ مدام پہ بلوچ راج ءُ پہ سرزمین ءِ رکینگ ءَ کار کتگ۔
وسیم سپر ءَ پہ استاد واھد کمبر ءِ آجو کنگ ءَ وتی ھیال ھم درشان کُرتگ اَنت ءُ کیچ بار ایسوسیشن ءِ باسک ءُ ایڑوکیٹ مھراب گچکی ءَ وتی ھیال ھم درشان کرتگ اَنت ءُ گْوشتگ کہ پہ زندگیں مردماں توار چست کنگی اِنت اے مئے ءُ شمئے سر ءَ پرز اِنت کہ اگاں چہ تمپ ءَ یک زرمبشتے چست بیت داں ڈیرگازی ءَ روت۔ بلے اد ءَ کور ءُ گنگانی شھر اِنت۔ ھنچیں مرم ھست کہ 20 سال اِنت گار ءُ بیگواہ اَنت۔ اے کَے بُرتگ اَنت، اگاں ما پیٹیشنے جما بہ کن ایں گڑا گُش اَنت کہ مئے کر ءَ نہ اَنت۔ اگاں ریاست ءَ ھوش نہ کت گڑا ما پہ زور آیانی زنداناں پروشین ءُ وتی گار ءُ بیگواھیں مردماں در کن ایں۔
گڈسر ءَ استاد واھد کمبر ءِ چک ایڈوکیٹ شاری بلوچ ءَ تران کنان ءَ گوشتگ کہ منی پت استاد واھد کمبر اِنت، منی کار آمیدگس ءَ بنت، من کانود ءِ یک نودربرے آں بلے مرچی من لاچاراں۔ اے ریاست ءَ پہ بلوچ ءَ ھچ چیز پشت نہ گیتکگ۔ من شاری بلوچاں ، یک وکیلے آں ءُ من پہ وتی کماش استاد واھد کمبر ءِ آجو کنگ ءَ ھر وڑیں پند بُرگ ءَ جاڑیاں۔ منی پت یک کماشے، آ نادراہ اِنت۔ مرچی شھید پدا چار راہ کہ ما سیاست کنگ ءَ اِیں ما چہ شھید پدا ءَ سیاست دربُرتگ۔
