کلات: دوشی زورگریں پاکستانی لشکر ءَ کلی زکریازئی منگچر ءَ گسے ءَ بیڑ برتگ ءُ سے برات مرید اھمد، مھبوب الی ءُ ارشاد اھمد ء ماسٹر مھمد الی لانگو آوار جتگ ءُ بیگواہ کرتگ اَنت۔
زور بیگواھیں مردمانی کھول ءَ آیانی زوریں بیگواھی ءِ بگیری ءَ منگچر بازار ءَ شال کراچی شھدگ بند کرتگ ءُ نشتگ اَنت۔ زھرشانی ءَ زھگ ءُ زالبولاں ھوار ھندی مردماں بازیں کچے ءَ بھر زرتگ۔
زھرشانی کنوکیں مردمانی گوشگ اِنت دانکہ مرید اھمد، مھبوب الی ءُ ارشاد اھمد آجو نہ بوتگ اَنت ما وتی زھرشانی ءَ برجاہ دار ایں۔
انچوش گوشگ بوگ ءَ اِنت چہ اے بیگواھیں براتاں مرید اھمد سر ءَ ھم شر نہ اِنت۔ پہ لاج ءَ ماھے ءَ گیش نادراہ جاہ ءَ بوتگ ءُ انوں گس ءَ آتکگ۔
