شال: پہ زور بیگواھیں مردمانی پدجنگ ءَ وی بی ایم پی ءِ شدکشیں زھرشانی گدان ءَ 5661 سرجم بوتگ۔ یک شمبے ءِ روچ ءَ سیاسی ءُ چاگردی کارکن میر بجار مری، مھمود بادینی، سریش بگٹی ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان بلوچ چکچینی ءَ ھوار پہ سرجمیں دمگ ءَ سردردے جوڑ بوگ ءَ اِنت۔ پاکستان پہ بلوچ زرمبشت ءِ دارگ ءَ نوک نوکیں سازگ ءَ اِنت۔
آئی ءَ گوشتگ کہ چہ دژمن ءِ درسیں زوراکیاں ابید سیاسی کارکن، نودربر گل ءُ آدگہ جھدکار گوں زوراکیاں دیم پہ دیمی کنگ ءُ دیم ءَ جنزگ ءَ اَنت۔ جنگانی تہ ءَ سوب گوں زور یا گوں مزنیں کچ ءَ ابید راستی ءَ بندوک اِنت۔ ھما درچک کہ شھیداں کشتگ ءُ گوں وتی ھوناں رودینتگ اَنت آ مارا زندگ دارگی اَنت۔
ماما کدیر گوشتگ کہ بلوچانی شھیدی مارا نزور نہ کنت توکل ءُ ھاٹیگ بکش ایت۔ بلوچانی شھید پہ پاکستان ءَ جست ودی کن اَنت۔ شھیدانی ھوناں رنگ آؤرتگ ءُ زرمبشت میان استمان ءَ گندگ بوگ ءَ اِنت ءُ بلوچ ءِ توار جھان ءِ ایوانانی تہ ءَ گوش دارگ بوگ ءَ اِنت۔
