بلوچ نیشنل موومنٹ ءِ دری کارانی کارگشاد پھیم بلوچ ءَ انسانی ھکانی درگت ءَ برتانیا ءِ پارلیمنٹ ءَ تران کُرتگ۔ اے دیوان ءِ رد ءُ بند انسانی ھکانی نیمگ ءَ بانک سوجن جوزپ ایم پی ءَ داتگ۔
وتی تران ءِ تہ ءَ بی این ایم ءِ دری کارانی کارگشاد ءَ بلوچ سرڈگار ءِ انیگیں جاورانی بابت ءَ گپ ءُ تران کُرتگ۔
آئی ءَ گْوشتگ کہ بی این ایم بلوچ ءِ آجوئی ءِ جُھد ءَ کنگ ءَ اِنت ءُ بلوچ راج ھم آجوئی لوٹ ایت ءُ پہ آجوئی ءَ ھزاراں جنجالانی دیمپانی ءَ کنگ ءَ اِنت۔
آئی ءَ گْوشتگ کہ بلوچ سرڈگار ءَ مادن باز اِنت، بلے بلوچ زوراکی ءُ زوراکی ءِ آماچ اِنت۔ ھزارانی کچ ءَ جنین ءُ مردین پاکستانی لشکر ءَ آورا جتگ ءُ بیگواہ کُرتگ اَنت۔
آئی ءَ گْرشتگ کہ زاکر مجید ءَ 15 سال بیت کہ بیگواہ اِنت، کہ آئی ءِ مات ءَ آئی ءِ اکس گون بیتگ ءُ گْوشتگ کہ اے منی گُڈی گپ اَنت کہ من گوں شما دزبندی کنگ ءَ آں کہ من اے اکس ءَ شُمارا پیشدارگ ءَ آں ایشی ءَ زندگ بہ کن اِت کہ اے یک گمیگیں ماتے ءِ چھرگ اِنت۔
آئی ءَ گْوشتگ کہ بی این ایم ءِ کلانھیں ڈاکٹر دین جان بلوچ ءِ جیڑہ مارا چارگی اِنت 15 سال ءَ پیش آوار جنگ بیتگ۔ انگت آئی ءِ کھول نہ زانت کہ کجا ءُ چون اِنت۔
آئی ءَ گْوشتگ کہ سَے روچ ءَ پیش چہ ھزدار ءَ ھشت سال پیش بیگواہ بیتگیں مردمانی ژانگولیں لاش دزکپتگ اَنت۔آیانی پت ءَ گْوشتگ کہ ما دلجم بیتگیں کہ مئے زھگ کشگ بیتگ ءُ کُشگ بیتگ اَنت، ماتاں مدام گریتگ کہ باریں مئے زھگ چونیں زوراکیانی دیمپان اَنت۔
پھیم بلوچ ءَ گْوشتگ کہ اے بلوچستان ءِ درناکیں کسھانی لھتیں دانک اَنت۔جست ھمیش اِنت کہ مردم پرچہ آوار جنگ بوگ ءَ اَنت، اے دُرس پہ بلوچستان ءِ آجوئی ءَ کنگ بیگ ءَ اَنت۔ ڈاکٹر دین مھمد ھم پمشکا آوار جنگ بیتگ۔
آئی ءَ گْوشتگ کہ بلوچستان زورگِر ءِ زوراکیانی دیمپان اِنت۔بلوچ ایوک ءَ آپ،نوکری ءُ سوئی ءِ گیس ءَ لوٹگ ءَ نہ اَنت، بلوچ پہ بلوچستان ءِ آجوئی ءَ جُھد کنگ ءَ اَنت۔
پھیم بلوچ ءَ گْوشتگ کہا چہ مسٹر جوزپ ءِ پیمیں سروکاں ھمے اوست ءَ ادارایں کہ آ پہ بلوچ راج ءَ توار چست کن اَنت،کہ پہ وتی آجوئی ءُ انسانی ھکاں جُھد کنگ ءَ اَنت۔
