بلوچ راجدوستیں آجوئی لوٹوکیں سروک رھیم بلوچ ایڈوکیٹ ءَ ماں رسانکدر ءَ چہ انسانی ھکانی گلاں لوٹ کرتگ کہ آ پاکستانی چیریں ادارھانی دست ءَ بیگواھیں استاد واھد کمبر ءُ پہ آدگہ ھزارانی کچ ءَ بلوچاں توار چست بہ کن اِت۔
آئی ءَ گوشتگ کہ واھد کمبر ءِ کھول ءُ ھمبلاں انگت ءَ آئی جاہ، سلامتی ءُ آئی سر ءَ جتگیں بھتامانی باروا گوشگ ءَ نہ اَنت۔
رھیم بلوچ ءَ گوشتگ کہ واھد کمبر پاکستانی چیریں ادارھانی کارمنداں 19 جولائی 2024 ءَ چہ کرمان ءَ آوار جتگ کہ آ اود ءَ الاج ءَ شتگ۔ واھد کمبر بلوچ راجی آجوئی زرمبشت ءِ یک نامداریں مردمے۔
آئی ءَ گوشتگ کہ بلوچ راجی آجوئی جھد یک شر ءُ ھکی ئیں لوٹے۔ میان استمانی کانود ءَ آجوئی پہ درسیں راجاں یک منّگ بوتگیں ھکے۔
بلوچ رھشون ءِ گوشگ اِنت کہ پاکستان ءِ بلوچ آجوئی لوٹوکیں سروک ءُ کارکنانی زوریں بیگواھی ءُ درکانودی کوش ءِ پالیسی انسانی ھکانی تچکی ءَ بگیری اِنت۔ زوریں بیگواھی میارباری یے ءُ پاکستان دیر اِنت گوں بلوچاں ھمے میارباری ءَ کنگ ءَ اِنت۔
رھیم ایڈوکیٹ ءَ گڈی ءَ گوشتگ کہ باید اِنت میان استمان ءُ انسانی ھکانی گل پہ واھد کمبر ءُ آدگہ بیگواھیں مردماں گامگیج زور اَنت کہ آ پاکستانی لشکر ءُ چیریں ادارھاں بیگواہ کرتگ اَنت۔
