اوتھل: نودربر بیان در ءِ زوری بیگواھی ءِ بگیری ءَ لوامز زانشتجاہ اوتھل ءَ مرچی پنچ روچ اِنت کہ زھرشانی نندانک برجاہ اِنت۔ زور بیگواھیں بیان در ءِ کھول ھم شتگ ءُ زھرشانی ءَ نشتگ۔
چارشمبے ءِ روچ ءَ بیان در ءِ یل نہ کنگ ءِ بگیری ءَ زھرشانی روانکے ھم کشگ بوتگ۔ مرچی روانک ءَ گلزادی، زور بیگواھیں راشد ھسین ءِ برازتک ماہ زیب ءُ آدگہ مردماں بھر زرتگ۔
روانک ءَ ھواریں مردماں زور بیگواھیں بیان در ءِ اکس، پلے کارڈ دستاں بوتگ اَنت کہ آیاں زوریں بیگواھی ءِ بگیری ءَ اوگام جتگ ءُ پہ درسیں بیگواھیں مردمانی آجوئی ءَ لوٹ کرتگ۔
آیاں تران کرتگ ءُ گوشتگ کہ بلوچستان ءَ ریاست ءِ نیمگ ءَ زوریں بیگواھی ءُ ناھکیں کشت ءُ کوش روچ پہ روچ ءَ تیز بوگ ءَ اِنت۔ اے درچ ءَ گیشتر بلوچ نودربر چہ وانگجاہ ءُ آدگہ جاھاں نشانگ کنگ بوگ ءَ اَنت۔ بلوچ نودربر نہ تیوک ءَ بلوچستان بلکیں سند ءُ پنجاپ ءِ ھم جتاجتائیں زانشتجاھاں زور بیگواہ کنگ ءُ ترسینگ بوگ ءَ اَنت۔
آیاں گوشتگ کہ بلوچستان ءِ ھمک ھند ءُ دمگاں پہ پھازداری ءِ نام ءَ پاکستانی لشکر چوکی ءُ بنجل بندگ ءَ اِنت، بلے ھما ھند ءَ لشکری بنجل ءَ ھست اَنت اود ءَ گیشتر مردم زور بیگواہ کنگ بوگ ءَ اَنت۔
آیاں گوشتگ کہ مدام چہ سرکار ءِ نیمگ ءَ ھمے ٹاپار جنگ بیت پہ بلوچستان ءِ دیمروئی ءَ کار کنگ بوگ ءَ اِنت۔ گڑا بلوچستان ءِ دیمروئی ھمیش اِنت کہ بلوچ نودربر وانگجاھاں ھم پھریز نہ اَنت۔
