لسبیلہ: اوتل زانشتجاہ ءِ جنک ءُ بچکیں نودراں پہ وتی ھم تبکیں نودربرانی بیگواہ کنگ ءِ بگیری ءَ زھرشانی روانکے کش اِتگ۔
آیاں بیگواھیں نودربرانی اکس ءُ پلے کارڈ دستاں بیتگ اَنت ءُ آیانی زوت آجو کنگ ءِ لوٹ اِش کُرتگ۔
آیاں تران کنان ءَ گْوشتگ کہ آ زانشتی پِڑ ھم پھریز نہ اَنت، ما نودربرانی آوار جنگ ءُ بیگواہ کنگ ءَ وش نہ بیں ءُ اے گوں مئے وانگ ءُ زندگیاں گوازی کنگ ءَ اَنت، ما داں وتی ھم تبکیں نودربرانی آجوئی ءَ بے توار نہ بیں۔
نودربرانی رِد ءَ گْوستگیں روچ ءَ چہ اوتل بازار ءَ چار نودربر گلاب، بالاچ، بیان ءُ ناسر آوار جنگ بیتگ اَنت کہ چہ ایشاں لھتیں آجو بیتگ ءُ آدگہ انگت بیگواہ اَنت۔
آیاں گْوشتگ کہ مدام بلوچستان ءِ نودربر نشانگ کنگ بیگ ءَ اَنت۔بلے ما پہ وتی ھکاں توار چست کن ایں، اگاں مئے ھم تبک یل کنگ نہ بوت اَنت گڑا ما گیش زھرشانی کن ایں ءُ اے دُرسانی زمہ وار انتزامیہ اِنت۔
یات بہ بیت کہ اے نودربر پاکستانی لشکر ءَ چہ بازار ءِ تہ ءَ مردمانی دیم ءَ آوار جتگ ءُ بُرتگ اَنت۔
