بلوچ سروک ءُ بلوچ راجی زرمبشت ( بی این ایم) ءِ پیشیگیں سرکماش ھلیل بلوچ ءَ بی ایس او ءِ پنجاہ ھپتمی سالروچ ءِ درگت ءَ وتی شنگ کرتگیں درشانے ءَ گوشتگ کہ بلوچ نودربرگل (بی ایس او) نہ تیوک ءَ یک گلے بلکیں یک ھنچیں لیکھی درے کہ آئی پُشت ماں پُشت بلوچ ورنایان ءَ زانت بکش اِتگ۔اے ادارہ ءَ ورنایان ءَ تیوک ءَ داں زانت ءُ گل ءِ چست ءُ ایراں نہ داشتگ بلکیں آیان ءَ وتی راج ءِ مُچی جیڑہ، راجی پجار ءُ آجوئی ءِ جُھد ءِ راہ نشون داتگ۔ اے گل پہ ھما ورنایا یک مادنیں راھے کہ چہ درکسانی ءَ داں ورنائی ءَ راجی لیکہ اِش زُرتگ ءُ وتی واب اِش پہ راج ءِ نام ءَ ندر کُرتگ اَنت۔
آئی ءَ گْوشتگ کہ بی ایس او ءِ پنجاہ ءُ ھپت سالانی جُھد مدام ھمے گپ ءِ شاھدی ءَ دنت کہ وھدے ورنا پہ وتی مول ءُ مراداں بندوک بنت گڑا آ نہ تیوک ءَ وتی راج ءِ تالِھ ءَ مَٹ کن اَنت بلکیں نوکیں گْوستانک نکش کنگ ءِ توان ءُ ھاٹیگ ءَ دار اَنت۔ من دلجماں کہ اے ادارہ آؤکیں باندات ءَ ھم گوں ھمے جوزگ ءُ مھکمی ءَ بلوچ راج ءِ ورنایاں زانت ءُ دیمونی ءِ درونت ءَ دنت۔ ایشی ءِ سوبمندی بلوچ راج ءِ آجوئی،پگری آجوئی ءُ رژنائیں باندات ءِ مانزمان اِنت۔
آئی ءَ گْوشتگ کہ بی ایس او ھما ادارھانی تہ ءَ شُمار بیت کہ آ نہ تیوک ءَ یک گلے بلکیں یک مھکم ءُ مادنیں راھے کہ آ پدریچانی رھشونی ءَ کنت۔ اے ادارہ نہ تیوک ءَ بلوچ ورنایاں راجی لیکہ دنت بلکیں آیاں وتی راجی ھک، زمہ واری ءُ راجی باندات ءِ باروا ٹوھیں زانت ءُ زانگے دنت۔ ورنائی ءِ روچاں راجی رژنائیں مارشت ءِ سکین دیوکیں اے ادارہ ھمے گپ ءَ نشون دنت کہ راجی جھد ءِ تہ ءَ مھکمیں لیکہ ءُ گل چنچو ھژدری انت۔
بلوچ سروک ءَ گْوشتگ کہ بی ایس او ءِ پنجاہ ءُ ھپتیں سالانی جُھد گوستانک ءِ یک رُژنائیں درے کہ چہ دیمونی،توانمندی ءُ گوں بازیں جپاکشیاں بندوک اِنت۔ اے ادارہ تیوک ءَ گوست ءِ سوبمندیانی پھازوک نہ اِنت بلکیں پہ آؤکیں جنجالانی دیم پہ دیمی کنگ ءَ مدام چاڑکہ اِنت۔ منی دل ءِ واھشت اِنت کہ اے مادنیں راہ ھمے وڑ ءَ رژنا بہ بیت ءُ ھمک پدریچ ءَ زوراکیانی بگیری ءَ جھد کنگ ءِ توکل ءُ بودناکی ءِ ھاٹیگ ءَ بہ دنت۔
آئی ءَ گْوشتگ کہ گوں بی ایس او ءَ بندوک بیگ نہ تیوک ءَ پہ من پھرے بلکیں پہ راجی زمہ واریانی پیلو کنگ ءَ یک کِردی درے بیتگ۔ اے گل ءَ نہ تیوک ءَ من ءَ باسمائیں کشکے ءِ راھے کرتگ بلکیں یک ھنچیں جاھے ءَ سر کُرتگ کہ اود ءَ راجی، سیاسی ءُ چاگردی جیڑھانی سرپد بیگ ءَ وتی کِرد ءِ پیلو کنگ ءِ ھیل داتگ۔ بی ایس او ءِ تہ ءَ گْوازینتگیں روچ پہ من یک پگری ءُ گل ءِ ھیلکاری ءِ درے بیتگ، آئی منی واھشت گوں یک گرانبھائیں مول ءُ مرادے ءَ ھمگرنچ کنگ ءَ جوانیں کردے پیلو کرتگ۔
