گوادر:یکجھتی کمیٹی ءِ سرکماش ڈاکٹر مھرنگ بلوچ دو شمبے ءِ روچ ءَ گوادر ءَ بار کونسل ءَ شُتگ کہ بار کونسل ءِ سروک نئیم شریپ ءُ آدگہ مردماں آئی ءَ وش اتک کُرتگ۔
ڈاکٹر مھرنگ بلوچ ءَ گوں وکیلاں تران کنان ءَ گْوشتگ کہ مارا سیاسی کارکن ءُ وکیلاں باز جُھد کنگی اِنت، چے ءَ کہ مئے مردم انگت سرپد نہ اَنت کہ چے بیگ ءَ اِنت، آ چہ پیسر ءَ ھمنچُک زوراکی ءِ آماچ کنگ بیتگ اَنت کہ مرچی لشکر آیانی گِساں ماندار ایت ءُ مردماں چہ گِساں در کنت بلے جُست کنوک نیست۔
آئی ءَ بلوچستان ءِ انیگیں لشکرکشی ءِ بابت ءَ گْوشتگ کہ بلوچستان ءَ لشکرکشی کنگ ءِ پیسلہ کنوکیں ٹولی کانودی ٹولی یے کہ چوشیں پیسلہ کُرت کنت۔
آئی ءَ گْوشتگ کہ بلوچستان ءِ لشکرکشی ءِ باروا مرچی پاکستان ءِ زانوگر بےتوار اَنت۔پنجاب ءِ اھوالکار ءُ آدگرانی لوٹ ھمے بیتگ کہ بلوچستان ءَ لشکرکشی کنگ بہ بیت۔پمشکا ما ھمے زوراکی ءِ بگیری ءَ یک سیاسی زْرمبشت ئِے بِناہ کُرتگ۔
آئی ءَ گْوشتگ کہ پاکستان ءِ آمیدگس ھم بلوچ چکچینی ءَ ھوار اَنت،دیمتر ءَ گیشتِر زوراکی کن اَنت بلے پہ بلوچ راجی ھستمان ءَ مارا اے زْرمبشت مھکم کنگی اِنت۔
