تربت: بلوچ یکجھتی کمیٹی ءِ نیمگ ءَ شھید بالاچ مولابکش ءِ سالروچ ءِ درگت ءَ شھید پدا اھمد چاراہ ءَ دیوانے برجم دارگ بوتگ۔ دیوان ءَ چہ جتائیں ھند ءُ دمگاں اتکگیں جتائیں بھرگاں سیادی داروکیں مردماں بازیں کچے ءَ بھر زرتگ۔
دیوان ءَ بلوچ یکجھتی کمیٹی ءِ سروک ڈاکٹر ماہ رنگ ءَ تران کرتگ ءُ گوشتگ کہ ریاست بلوچانی مڈیاں لٹ ءُ پل کنگ ءُ بلوچ چکیچی کنگ ءَ اِنت۔ گوستگیں دو دھک اِنت کہ بلوچستان ءَ ھمک وھد ءَ لاشانی کپگ برجاہ اِنت۔
ڈاکٹر ماہ رنگ ءَ گوشتگ کہ شھید بالاچ مولابکش بے کس لیکگ ءُ آئی ژانگولیں لاش چگل دیگ بوتگ بلے آئی کھول بے توار نہ بوتگءُ زھرشانی کنگ اِش بندات کرتگ۔ چہ 23 نومبر ءَداں 6 دسمبر 2023 ءَ تربت ءَ لاش ءِ ھواری ءَ زھرشانی نندانک برجاہ بوتگ۔ چہ ایشی پد ما چہ تربت ءَ داں اسلام آباد ءَ شتگ ایں۔
آئی ءَگوشتگ کہ چہ ریاستی زوراکیاں ابید بلوچاں وتی جھد برجاہ دارگی اِنت گوستگیں یک سالے ءِ میان ءَ دو سد ءَگیش ورنا آوار جنگ بوتگ۔ ھمک بلوچ ءِ گس نشانگ کنگ بوتگ اَنت۔
چہ ڈاکٹر ماہ رنگ ءَ ابید ایڈوکیٹ مھراب ھان گچکی، ایڈوکیٹ ابدالمجید شاہ، سبگت اللہ شاہ جی ءُ ابدالمجید دشتی ءَ ھم تران کرتگ۔
