کیچ:بلوچ وومن پورم تمپ ھنکین ءِ آرگنائزنگ باڈی دیوان بُنجاھی آرگنائزر ڈاکٹر شلی ءِ سروکی ءَ برجم دارگ بوتگ۔ دیوان ءِ بُن گپ بُنجاھی سرکولر ، گل کاری ، ھندی ءُ میان اُستمانی سیاسی جاور ھال ءُ آؤکیں گام گیج بوتگ اَنت۔
دیوان ءَ بُنجاھی سنگت ءَ بنجاھی سرکولر ونتگ سوڑگ ءُ هبرانی سرا باوست بوتگ۔
دیمترا گل کارانی سر ءَ سنگتاں تران کنان ءَ گوشتگ کہ اے مئے زمہ واری اِنت کہ ما ایوک ءَ یک جاھے ءُ یک دمگے ءَ بندوک مہ بہ ایں۔ ما وتارا بلوچستان ءِ ھمک میتگ ءُ کوچگاں سر بہ کن ایں ءُ مردماں وتی ھمراہ بہ کن ایں، بیدے لس مھلوک ءِ ھمراھی ءَ ما ھچبر وتی مِنزل ءَ سر بوت نہ کن ایں۔ تمپ بانک کریمہ ءِ میتگ اِنت کہ ادا بانک ءَ وتی شپ ءُ روچ داتگ، لوگ پہ لوگ شُتگ مھلوک ءَ را سیاسی سرکل داتگ ءُ آیان ءَ پہ جُنز ءَ ساڑی کرتگ۔ بانک ءَ وتی سرجمیں زند پہ بلوچ راج ءَ ندر کرتگ دانکہ گُڈی ساہ ءَ آئی ءَ مارا شمارا یک راھے شون داتگ۔ گڑا مئے شُمے زمہ واری اِنت کہ ھما کار کہ بانک ءِ روگ ءَ پد پشت کپتگ اَنت آیاں دیم ءَ بہ بر ایں ءُ بانک ءِ پیش داشتگیں راہ ءَ راھی بہ بہ ایں۔ مروچی اگاں ما شما یکیں پتر ءِ سرا نشتگیں گڑا اے بانک ءِ جھدانی برورد اِنت کہ زالبول ھمک زوراکی یے دیم ءَ اولی سرپ ءَ اوشتوک اَنت۔ ما شما گوں یک انچیں زمینے ءَ سیادی دار ایں کہ آ زمین زورگپت اِنت ءُ زوگپتیں زمین ءِ سر ءَ وڑ وڑیں جیڑه سر کش اَنت ءُ جِتا جِتائیں سکیانی دیمپان بوگی اِنت گڑا اے منی ءُ تئی زمہ واری بیت کہ زمینی راستیانی ھساب ءَ وتی کاراں دیم ءَ بہ بر این ءُ زالبولاں سیاسی پارست ءَ شیوار بہ کن ایں۔
دیمترا سنگتاں تران کنان ءَ گوشتگ کہ دومی نیمگ ءَ اگاں ما بہ چار ایں بلوچ ءِ ورنا نشہ ءِ آماچ کنگ بوتگ اَنت۔ آ پہ لاپ ءِ شوھازگ ءَ انچو در پہ در کنگ بوتگ اَنت ءُ انچو مان گیشینگ بوتگ کہ آ پہ وتی راجی سیت ءُ نپانی جیڑ اِت مہ کن اَنت۔ مند ءُ تمپ ءِ وڑیں مزنیں میتگاں نہ وانگجاہ پہ وانگ ءَ هست اِنت نا کہ شریں نادراھجاھے ھست، نام ءِ بلڈنگ ھست اَنت اودا ڈاکٹرے ھم نہ گواہ ایت، چہ کسان کسانیں چہ نادراھیاں مردم مرگ ءِ آماچ بوگ ءَ اَنت، بیست ءُ یکمی کرن ءَ منی ءُ تئی کِرّا تپ ءِ سر ءَ ھم مردم مِرگ اَنت۔ اے مئے بے تواری ءِ سوگات اَنت کہ بلوچ مروچی چہ ھمک بُنکی آسراتی ءَ زبھر کنگ بوتگ۔
دیمترا تران کنان ءَ سنگتاں گوشتگ کہ مارا اے دمگاں گیش ءَ چہ گیش زالبولانی سر ءَ کار کنگی اِنت ءُ آیاناں سرپد کنگی اِنت دانکہ باندا روچ آ زوراکی ءِ بگیری ءَ پاد بیا اَنت ءُ لس مھلوک ءِ دل ءِ تہ ءَ ھما کہ ترس نادینگ بوتگ آ ترس ءَ ھلاس بہ کن اَنت دانکہ آ پہ وتی راجی سیت ءُ نپاں بہ جیڑ اَنت۔
گُڈ سر ءَ آؤکیں گام گیج ءِ تہ ءَ بلوچ وومن پورم تمپ ھنکین اڈ دیگ بوتگ، ھانی آرگنائزر، سمّی ڈپٹی آرگنائزر، آرگنائزنگ کمیٹی باسک لکی، سیما،وسیل، آتیکہ ءُ شیما گچین کنگ بوتگ اَنت۔
