آواران: چہ تیرتیج ءَ زورگریں پاکستانی لشکر ءِ دست ءَ زور بیگواہ کنگ بوتگیں دلجان ءِ کھول ءِ زھرشانی نندانک ءَ چار روچ اِنت کہ برجاہ اِنت۔ چہ نندانک ءَ ابید آواران بیلہ شھدگ جتا جتائیں جاھاں بند کنگ بوتگ۔
اے درگت ءَ کھول ءِ گوشگ اِنت کہ چہ سرکار ءِ نیمگ ءَ پہ مئے لوٹانی منّگ ءَ ھچ وڑیں گامگیج زورگ نہ بوتگ۔ سرکار مئے لوٹانی درگت ءَ مئے گون ءَ گپ ءُ تران ءَ جاڑیگ نہ اِنت۔
آیانی گوشگ اِنت کہ سرکار چہ دلجان ءِ آجوئی مئے گون ءَ گپ ءُ تران ءَ ابید مئے زھرشانی ءِ نزیکیں گس ءُ دکانداراں بیھار دیگ بوگ ءَ اَنت کہ ایشاں کمک مہ کن اِت۔
کھول ءَ گوشتگ کہ ما نزانیں سرکار مئے گون ءَ کجام میار ءِ بنیاد ءَ اے وڑ کنگ ءَ اِنت۔ چہ مئے لوٹانی منگ ءَ ابید ما گیشتر زوراکیانی دیمپان بوگ ءَ ایں۔
آیانی گوشگ اِنت دانکہ دلجان آجو کنگ نہ بوتگ ما وتی زھرشانی نندانک ءَ برجاہ دار ایں۔
