آواران: زوگریں پاکستانی لشکر ءِ دست ءَ بیگواہ کنگ بوتگیں دلجان ءِ کھول ءِ نیمگ ءَ آواران دمگدار ءِ کارگس ءِ دیم ءَ زھرشانی نندانک ءَ سے روچ اِنت برجاہ اِنت۔ مرچی دو روچ بوتگ کہ آیاں نندانک ءِ ھواری ءَ آواران کراچی شھدگ ھم بند کرتگ۔
زھرشانی ءَ سول سوسائٹی تربت ءِ سروک گلزار دوست، بلوچ وومن پورم شال ھنکین ءِ سروک سلتانہ ءَ ھوار سیاسی ءُ چاگردی کارکن ءُ زھگ ءُ جنیناں ھوار مردم بازیں کچے ءَ نشتگ اَنت۔
زھرشانی ءَ نشتگیں مردمانی گوشگ اِنت کہ مرچی مئے زھرشانی نندانک ءَ سے روچ اِنت کہ برجاہ اِنت۔ 18 نومبر ءَ ما چہ یو بی ایل بینک ءَ داں دمگدار ءِ کارگس ءِ دیم ءَ زھرشانی روانکے کش اِتگ ءُ پدا نندانک ءَ نشتگ ایں۔ زی دمگدار ءِ کارگس ءِ دیم ءَ نندگ ءِ ھواری ءَ جتائیں شھدگ بند کرتگ اَنت۔ بلے انتزامیہ پہ گپ ءُ تران کنگ ءَ اتکگ آ وتی پیسری نبشتھی کول ءَ منگ ءَ نہ اِنت۔
آئی ءَ گوشتگ کہ ھما انتزامیہ پہ گپ ءُ تران ءَ اتکگ وتی پیسری گپان جنگ ءَ اِنت۔ باندا پونشی یا پنچ روچ ءِ وھد لوٹگ ءَ اِنت ءُ مئے کھول ءَ پیسری وڑ ءَ دروگیں دلبڈی دیگ ءَ اِنت۔ پھازداریں درسیں ادارہ کس مارا پھازدار دیگ ءَ نہ اَنت، دو روچ بیت کہ جنین ءُ زھگ وتی بیسہ ءَ وت نشتگ اَنت ءُ ریاست ءِ زوراکیاں اوپار کنگ ءَ اَنت۔
آئی ءَ گوشتگ کہ مرچی سھب ءِ ھشت ءَ پاکستانی لشکر ءَ آواران دمگدار ءِ کارگس ءِ دیم ءَ مئے برجاھیں زھرشانی نندانک چاریں نیمگاں انگر کرتگ۔ کمو رند ءَ ھمے لشکر ءِ مردماں جنینانی ترسینگ ءِ جھد کرتگ کہ آیانی تامربند ھست آ ساپ گندگ بنت۔
آئی ءَ گوشتگ کہ ما گوں آواران ءِ باسمائیں مردماں لوٹ کن ایں کہ اے میان ءَ دلجان ءِ کھول ءَ شمئے کمک درکار اِنت ءُ درسیں بھرگاں سیادی داروکیں مردمانی گون ءَ لوٹ کن ایں کہ بیا اَنت ءُ پہ دلجان ءِ کودکیں زھگاں توار چست بہ کن اَنت۔
