بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مستونگ ءَ زورگریں پاکستانی لشکر ءُ چیریں ادارھانی دو چاریگ دزگیری ءَ پد کشتگ اَنت، گْوادر ءَ پاکستانی لشکر ءِ کارمند گوں بمب ءَ نشانگ کرتگ اَنت۔
آئی ءَ گوشتگ کہ بی ایل اے ءِ سرمچاراں 16 نومبر ءِ شپ ءَ گْوادر نیو ٹاؤن ءَ پاکستانی لشکر اے این ایپ ءِ کارگش گوں دستی بمب ءَ نشانگ کرتگ۔ اُرش ءَ دژمنیں کارمنداں جانی ءُ مالی تاوان بوتگ۔
جارکش ءَ گوشتگ کہ بی ایل اے ءِ سرمچاراں مستونگ ءِ ھند مَرو، اسپلنجی ءَ 10 نومبر ءَ زورگریں پاکستانی لشکر ءِ چیریں ادارہ ملٹری انٹیلیجنس ( ایم آئی) یک کارمندے ابدرھمان ء ھدا رھیم جاہ منند ڈیرہ مراد جمالی دزگیر کرتگ۔
آئی ءَ گوشتگ کہ جست ءُ پرس ءِ میان ءَ ابدرھمان ءَ منّ اتگ کہ آئی ءَ پاکستانی چیریں ادارھانی کارمنداں اسپلنجی ءَ چندہ گرگ ءِ دروشم ءَ پہ چاریگی ءَ دیم داتگ۔
جارکش ءَ گوشتگ کہ دژمن ءِ کمکار ءَ دیمتر ءَ منّ اتگ کہ آ زورگریں لشکر ءِ بھر اِنت ءُ تپتان، نوشکے ءُ مستونگ ءَ دژمن ءِ چیردستی ءَ چاریگی ءَ بوتگ، وھدے کہ جست ءُ پرس ءِ میان ءَ آئی وتی نیٹورک ءِ آدگہ مردمانی نام ءُ ڈس داتگ اَنت۔
آئی ءَ گوشتگ کہ بی ایل اے ءِ سرمچاراں 13 نومبر ءَ پاکستانی لشکر ءِ دگہ یک چاریگے مھمد نور ء مھمد اسلم جاہ منند پنجاپ دزگیر کرتگ۔
جارکش ءَ گوشتگ کہ اے چاریگ ءَ منّ اتگ کہ آئی وتی دروشم مٹ کرتگ اسپلنجی، مَرو ءُ کِر ءُ کشاں پہ پاکستانی لشکر ءَ چاریگی کنگ ءَ بوتگ۔ چہ ایشی پیش سند ءِ جتائیں ھنداں ھم پہ پاکستانی لشکر ءِ چیردستی ءَ چاریگی کرتگ۔
آئی ءَ گوشتگ کہ اے چاریگانی سر ءَ میارباری ءِ سرزد بوگ ءَ بلوچ راجی آمیدگس ءَ مرگ ءِ سزا گوشتگ ایشی سرا سرمچاراں کار کرتگ ءُ دوئیں کشتگ اَنت۔
جیھند ءَ سے ئیں اُرشانی زمہ واری منّ اتگ ءُ گوشتگ کہ زورگریں پاکستانی لشکر ءُ آئی شریدارانی بگیری ءَ مئے کاروائی برجاہ بنت۔
