آواران: زورگریں پاکستانی لشکر ءِ دست ءَ زور بیگواہ کنگ بوتگیں دلجان ءِ کھول ءِ نیمگ ءَ پہ آئی زوریں بیگواھی ءِ بگیری ءَ مرچی دومی روچ ءَ آواران دمگدار ءِ کارگس ءِ دیم ءَ زھرشانی نندانک برجاہ بوتگ، کھول ءَ زھرشانی آواران کراچی شھدگ بند کرتگ۔
زھرشانی نندانک ءَ سیاسی ءُ چاگردی کارکنانی ھواری ءَ جنین ءُ زھگاں بازیں کچے ءَ بھر زرتگ ءُ نشتگ اَنت۔ چہ ریاست ءِ بیھارانی سوب ءَ دکانداراں زھرشانی کنوکان ءَ ٹینٹ نہ داتگ آ ابید ٹینٹ ءَ سارتی ءِ سر ءَ نشتگ اَنت۔
زھرشانی کنوکانی گوشگ اِنت کہ پاکستانی لشکر ءُ پولیس مارا یکشل ءَ ترسینگ ءَ اَنت کہ ما وتی زھرشانی ءَ ھلاس بہ کن ایں۔ بلے دانکہ دلجان آجو نہ بوتگ ما وتی زھرشانی ءَ برجاہ دار ایں۔
یات بہ بہ اِت کہ دلجان ءَ زورگریں پاکستانی لشکر ءَ 12 جون 2024 ءَ آوار جتگ ءُ بیگواہ کرتگ۔ آئی زوریں بیگواھی ءِ بگیری ءَ چہ ایشی پیش ھم کھول 3 اکتوبر 2024 ءَ آواران دمگدار ءِ کارگس ءِ دیم ءَ زھرشانی ءَ نشتگ اَنت۔
