مند: مھیر ءَ پاکستانی لشکر ءِ زوراکیا نی بگیری ءَ برجاھیں زھرشا نی نندانک جاہ ءَ بلوچ وومن پورم ء ِ نیمگ ءَ ریاستی زوراکی ءُ لس مھلوک ءِ زمہ واری ءِ بنگپ ءَدیوانے برجم دارگ بوتگ۔ دیوان ءَ مند ءِ جاہ منندیں مردماں بازیں کچے ءَ بھر زرتگ۔
دیوان ءَ بلوچ وومن پورم ءِسروک ڈاکٹر شلی ءَ تران کرتگ ءُ گوشتگ کہ بلوچ راجی جیڑھانی سر ءَ جتا جتائیں جاھاں گپ جنگ بیت ءُ بلوچ یک پجارے ءِ واھند اِنت بلے بلوچ ءَ اے پجار چہ دیمونی ءُ ھونریچی ءَ پد رستگ۔ اے شھیدانی ھونا نی برورد اِنت کہ ما ءُ شما یکیں تلو ءَ نشتگ ایں۔ شھیدانی ھونانی گون ءَ کدی دگ ءَ کنگ نہ بیت اگاں ما گوں شھیدانی ھوناں دگ ءَ کرتگ گڑا بلوچ راجدپتر مارا کدی نہ بکش ایت۔
آئی ءَ گوشتگ کہ شھیدانی ھوناں مارا یک نامے داتگ ما شھیدانی پشپد ایں گڑا آ کجام ترس اِنت کہ مارا جھد کنگ ءَ نیل ایت۔ اگاں نامءَ بہ چار ایں گڑا مند نہ ترسیں بامردانی سرڈگار اِنت آھچبر دیمونی دیگ ءَ چک ءُ پد نہ بوتگ اَنت۔ رھشون واجہ گلام مھمد بہ بیت یا شیر مھمد بہ بیت مرچی آیانی دیمونیانی برورد اِنت کہ بلوچ ءِ جھد میتگ میتگ ءَ سر اِنت۔
ڈاکٹر شلی ءَ گوشتگ کہ اگاں تو بلوچے ءِ گپ کن ئے یا نہ کن ئے بلے ترا ریاست جنت، چی ءَ کہ بلوچ سرڈگارءُ چہ بلوچ گسے ءَ ودی بوتگ ئے۔ ھیات ءُ ملکناز کے اِت اَنت آ چی ءَ جنگ بوتگ اَنت۔ھیات ءِ میار ھمیش اَت کہ آ بلوچے اَت کہ ھشت تیر آئی دلبند ءَ جنگ بوتگ۔ اگاں ھیات بے میار ءَ ھشت تیر جنگ ءُ کشگ بیت گڑا منءُ تو ھم بکشگ نہ بہ ایں۔ گڑا چہ ایشی شرتر اِنت کہ گوں وتی سرڈگار ءَ وپاداری بہ کن۔ اگاں مئے مردمے آوار جنگ بیت یا شھید کنگ بیت گڑا ما کا ایں توار چست کن ایں، اگاں ما انچو بہ نند ایں ھم جنگ بہ ایں۔
آئی ءَ گوشتگ کہ من ھما اِنت مند ءَ آتکگ آں مردم منی گون ءَ شھید گلام مھمد ءُ شھید بانک کریمہ ءِ گپاں کنگ ءَ اَنت کہ مند پیش ءَ چوش بوتگ۔ وھدے کہ شھیدچئیرمین گلام مھمد درکپتگ گڑا آئی پشت ءَ لشکرے بلوچ گوں بوتگ۔ وھدے کہ بانک کریمہ درکپتگ گڑا آئی پشت ءَ ھزارانی کچ ءَ جنین گوں بوتگ۔ تو ھم ھمے گلزمین ءِ پرند ئے گڑا تو پرچہ پاد نیا ئے۔ گڑا من ءُ تو شھید گلام مھمد ءُ شھید کر یمہ ءِ سر ءَ پھر بند ایں ءُ مندءِ مردم پھر بند اَنت کہ ما چئیرمین گلام ءِ ھنکین ءِ مردم ایں گڑا تو پرچہ پاد نیا ئے ءُ گلام مھمد ءُ کریمہ ءِ پگر ءَ دیم ءَ نہ برے۔ اے گپ المی نہ اِنت کہ من ءُ تو آجوئی ءَ گوں وتی چماں بہ گند ایں بلے ما آھوکیں باندات بہ گند ایت۔
ڈاکٹر شلی ءَ گوشتگ کہ پما ابید گھگیری ءَ دگہ ھچ پشت نہ کپتگ، اگاں ما انچو بے توار بوت ایں گڑا اے گپ ءَیاد بدار اِت کہ منی ءُ تئی ڈگارانی دستیگ کنگ ءُ مڈیانی لٹ ءُ ھمے وڑ ءَ برجاہ بیت۔ ما ھمنچو بے توار بوت ایں ھنچو تاوانانی دیمپان بہ ایں۔
