آواران: پاکستانی لشکر ءِ دست ءَ زور زوربیگواھیں دلجان ءِ کھول ءَپریس کانپریس کرتگ ءُ گوشتگ کہ ما چنچو بر ءَ وتی توار داں سرکاری ادارھاں سرکنگ ءِ جھد کرتگ بلے آیاں مئے درد نہ تیوکءَ گوش داشتگ بلکیں مارا دروگیں دلبڈی داتگ ءُ رد اِش داتگ۔ منی برات دلجان ء اللہ بکش ھچ پیمیں درکانودی کاراں ھوار نہ بوتگ، آئی ءَ چہ مئے ھند تیرتیج آواران ءَ 12جون 2024 ءَ لشکر ءَ آوار جتگ ءُ بیگواہ کرتگ۔ مرچی شش ماہ پرگوستگ بلے مئے دل ءِ بے چاڑی روچ پہ روچ گیش بوگءَ اِنت۔
آئی ءَ گوشتگ کہ مئے ھند آواران یک نیمگے ءَ نیزگاری ءُ بے آسراتی ءِ آماچ اِنت ءُدومی نیمگ ءَ آیاں ریاستی ادارھانی نیمگ ءَ زوریں بیگواھی ءُ مردمی ھکانی لگتمال کنگ ءِ دیمپانی اِنت۔ آواران ءَ ھمک روچ ورنا آوار جنگ بوگ ءَ اَنت۔ مئے چمانی دیم ءَ مئے برات، مئے زھگ ءُ آزیز بیگواہ کنگ بنت ءُ آیانی مات، گھار ءُ زھگ پریات کن اَنت۔
آئی ءَ گوشتگ کہ 12 جون ءِ شپ ءَ لشکر ءِ چار گاڑی مئے گس ءَ آتکگ ءُ مئے برات دلجان ءَ پہ زور گوں وت برتگ، ما زوت اے جیڑہ دمگی واکدار ءُ سرکار ءِ دیم ءَ ایر کرتگ، بلے ھمک بر ءَ مارا دروگیں دلبڈی دیگ ءَ اَنت کہ مرچی باندا دلجان یل کنگ بیت۔ بلے راستی ھمیش اِنت کہ مارا ابید چہ دلبڈی ءَ دگہ ھچ نہ رستگ۔ چہ دلجان ءِ بیگواھی ءَ مئے سرجمیں کھول جنجلانی دیمپان اِنت۔
آئی ءَ گوشتگ کہ ما پہ دلجان ءِ آجوئی ءَ پر ایمنیں زھرشانی کرتگ 3 داں 6 اکتوبر ءَ آواران کمک دمگدار ءِ کارگس ءِ دیم ءَ نندانک ءَ نشتگ ایں۔ مئے روانک ءَ ھمے ھند ءِآدگہ نزوریں مردماں بھر زرتگ کہ آ ھمے وڑیں جنجالانی دیمپان بوتگ اَنت۔ ھمے میان ءَ دمگی واکدار ءَ مئے گون ءَ گپ ءُ تران کرتگ ءُ نبشتھی ھمے کول کرتگ کہ دہ روچانی میان ءَ دلجان یل کنگ بیت۔ مارا ھمے دلجمی داتگ کہ اگاں دہ روچانی میان ءَ کول پیلو نہ کرتگ گڑا شما دوبر زھرشانی بہ کن اِنت۔
آئی ءَ گوشتگ کہ ماھے گوستگ بلے دمگی واکدار ءَ وتی کول پیلو نہ کرتگ۔ اے جاور مئے گون ءَ اوپار کنگ نہ بنت ما پہ وتی برات ءِ آجوئی ءَ ھرپیمیں جھد کن ایں، دمگی واکدار ءُ سرکاری ادارہ مئے رنجاں گوں سنگینی ءَ چارگ ءَ نہ اَنت۔ ما 18 نومبر ءَ آواران شھر ءَ روانکے کش ایں ءُ پہ دلجان ءِ آجوئی ءَ داں گڈی ھد ءَ جھد کن ایں۔ مئے لوٹ ھمیش اِنت کہ دلجان زوت دیم ءَ آرگ بہ بیت آئی سر ءَ چونیں بھتامے ھست گڑا آمیدگس ءَ پیش کنگ بہ بیتءُ ما پہ وتی آزایز ءَ انساپ دات بہ کن ایں۔
آئی ءَ گوشتگ کہ مئے گڈی اوست اِنت بلکیں مئے توار ءُ توانمندیں ند مئےآزیز ءِ آجوئی ءَ مئے کمک ءَ بہ کنت۔ ما چہ شمئے پارست ءَ مردمی ھکانی ادارہ ءُ گوں سرکار ءَ لوٹ کن ایں کہ آ دلجان ءِ آجوئی ءَ جوانیں کردے پیلو بہ کن اَنت۔ من گوں شما درساں ھمے لوٹ ءَ کن ایں کہ اے زھرشانیاں بھر بزور اِت ءُ مئے گون ءَ ھمدردی بہ کن اِت۔ مئے توار ءِ داں ادارھاں سرکنگ ءَ وتی کرد ءَ پیلو بہ کن اِت ءُ دلجانءَ ھوار درسیں بیگواھیں مردم آجو کنگ بہ بنت۔
