بلوچ راجی رھشون ءُ بلوچستان آجوئی سنگر ( بی ایل ایپ ) ءِ سرکماش ڈاکٹر اللہ نزر ءَ ماں رسانکدر ءَ وتی شنگ کرتگیں درشانے بیگواھیں بلوچانی توار ( وی بی ایم پی ) ءِ گدان ءِ ماندارگ پاکستان ءِ ریاستی ناشرکاری لیک اتگ۔
آئی گوشتگ کہ ریاست چہ ماما کدیر ءِ بے مٹیں جھد ءُ راستی ءَ ترس آماچ بوتگ ءُ نشانگ کنگ ءَ اِنت۔ چہ ایشی پیش ھم باز براں زور بیگواھیں مردمانی گدان ءِ تاوان دیگ ءُ ماندارگ ءِ ناشری دیم ءَ آتکگ اَنت، کہ ریاستی زوراکی ءُ پروش ءِ نشانی اِنت۔
بلوچ رھشون ءَ گوشتگ کہ ماما کدیر پاکستانی لشکر ءِ دست ءَ پہ زور بیگواھیں مردمانی آجوئی ءَ یک مھکمیں توارے۔ آئی پانزہ سالانی چیدگی شدکشیں ھرتال ءُ زھرشانی گدان جھان ءِ دراجکش ءُ پر ایمنیں زھرشانیانی تہ ءَ ھوار بیت۔ ماما کدیر ءِ وڑیں تچک ءُ مھکمی ءِ چیدگ ءِ ترسینگ ءِ اے جھد ریاست ءِ ناھودگی اِنت۔ چہ اے وڑیں ھیلھاں نہ ماما کدیر ءِ گام کنٹ بنت ءُ نہ بلوچ چہ وتی لیکہ ءَ پدکنز بیت۔
ڈاکٹر اللہ نزر ءَ گوشتگ کہ ما بلوچ راج ءِ گون ءَ لوٹ کن ایں کہ آ ماما کدیر ءِ گون ءَ ھمگام بہ بنت ءُ ریاست ءَ ھمے کلو ءَ بدے اَنت کہ مئے ارداہ ءَ پروش دات نہ کن ئے۔ اے وڑیں ویل مئے جھد ءَ گیش مھکم کنت۔ بلوچ راج چہ بندات ءَ ریاست ءِ زوراکی ءُ زورگپتی ءِ بگیری ءَ گھگیری کنگ ءَ اِنت آ وتی گڈی آسر ءَ بزاں بلوچ آجوئی ءِ نیمگ ءَ جنزگ ءَ اَنت۔
آئی ءَ دیمتر ءَ گوشتگ کہ زورگریں ریاستانی وڑ ءُ پیم ھمیش اِنت کہ آ ایردست ءُ نزوریں راجاں ترسینگ ءُ زور ءِ پارست ءَ بے توار کنگ ءُ چہ وتی گھگیری زرمبشت ءَ دزکش کنگ ءِ جھد کنگ بیت۔ بلوچ راج ءِ ھم اے جھد پہ ھمے سرڈگار ءِ آجوئی ءُ ھمے راہ ءَ داتگیں دیمونیانی ھک ءُ راستی ءَ اِنت۔ سوب مدام ھک ءُ راستی ءِ بیت۔
