چوش مہ بیت کہ آیوکیں پدریچ چہ بلوچ ءِ بنکی لوٹ ءَ بہ شموش ایت
گل ءِ باسک ، دوزواہ ، بلوچستان ءِ چاگردی ءُ مردمی اگبالانی باسک بلوچستان ءِ آجوئی ءِ گپ ءُ لوٹ ءَ چہ درسیں کاراں دیم ءَ تر بہ کن اَنت، پرچا کہ مئے جیڑھانی ھنڈال بلوچ راجی چیردستی اِنت ءُ چہ ایشی ءَ درکپگ ءِ راہ آزادی ءَ ابید دگہ نیست۔
اے گپ بلوچ راجی زْرمبشت ( بی این ایم ) ءِ کماش ڈاکٹر نسیم ءَ بی این ایم ءِ چارمی بنجاھی پتر ءِ بنداتی تْران ءَ کرتگ اَنت۔
آئی ءَ ھمے گپ ءِ سر ءَ دلگوش گْور کنان چد ءُ دیمتر ءَ گْوشتگ گل ءِ باسک ءُ دوزواہ بلوچستان ءِ جاور ، پہ بلوچ ءُ بلوچستان ءَ سیتمندیں راجدوستیں واک ءُ تواناں الم کمک بہ کن اَنت ، آیاں رسانک ءُ جھان ءِ دیم ءَ پجاروکی ءَ بہ کن اَنت بلے آجوئی ءِ جھد ءِ ارزشت گیشتر بہ بیت ءُ اے کارانی کمتر۔بی این ایم ءِ باسک چہ درساں پیش گوں وتی مراگشاں ھمگرنچ بہ بہ اَنت ، ھمیشانی دیمروئی ءُ تالانی ءَ کار بہ کن اَنت۔
سرکماش ءَ اے رد ءَ گْوشتگ بلوچ ءِ بنکی لوٹ ءُ آ دگہ کارانی تہ ءَ پیر ( فرق ) ھست ، مارا ھمے پیر ءِ تہ ءَ مانگیشگ نہ لوٹ ایت۔چوش مہ بیت کہ آ دگہ کار انچوش دیم ءَ آرگ بہ بہ اَنت کہ آیوکیں پدریچ وتی زْرمبشت ءِ لوٹ ءُ گزراں بہ شموش ایت۔ بلوچستان ءِ آجوئی ءِ لوٹ کنوکیں سھرائیں سیاسی گل اَنت کہ چہ آیاں ماں گلزمین ءُ چہ گلزمین ءَ ڈن بی این ایم چہ درساں گیش پرکار اِنت۔ پمیشکا بلوچ راجی آجوئی ءِ پلہ مرز ءُ بلوچ آجوئی ءِ زْرمبشت ءَ مگیم گندگ ءِ واھگدار بی این ایم ءِ پلہ مرزی بہ کن اَنت ءُ آجوئی ءِ مراگش ءِ دیم ءَ برگ ءَ وتی کرد ءَ پیلو بہ کن اَنت۔
بی این ایم ءِ سرکماش ءَ پاکستان ءَ استمانی سیاست ءِ بے سوبیانی نیمگ ءَ شھار دیان ءَ گْوشتگ پاکستان ءَ بلوچ راجی مچی ءِ دیم ءَ اڑاند ودی کرت، چار بلوچ شھید بوت ، پی ٹی ایم ءِ جرگہ ءِ دارگ ءِ کوشست کرت آ اود ءَ ھم چار پشتون شھید بوت ۔ زھرشانی ءُ نندانک ءَ پد بلوچستان ءَ زور بیگواھیانی تہ ءَ تیزی آرگ بیتگ۔ پنجاب ءَ دھاں بلوچ نودربر گوں ناترسی ءَ زور بیگواہ کنگ بیتگ ءُ پاکستان اے زوراکیانی بگیری ءَ چست بیوکیں تواراں نگٹ کنگ ءَ اِنت۔
ڈاکٹر نسیم ءَ انیگیں لھتے ویل ءُ کارپدانی بارہ ءَ گپ جتگ ، پارلیمانی سیاسی گلانی سر ءَ ھم ایراد گپتگ ، آئی ءَ گْوشتگ پیش ءَ چہ بی این ایم ءَ جست کنگ بیتگ اَت کہ بی این ایم پہ بلوچی زبان ءَ چہ کنگ ءَ اِنت۔ مروچی بی این ایم ءَ پہ بلوچی زبان ءُ ندانک ( لبزانک ) ءِ دیمروئی ءَ چیدگیں کار کرتگ۔ بلے ھما گل کہ پارلیمانی سیاست کن اَنت آ چی کنگ ءَ اَنت۔ دگہ گیشتر ناں بلے لھتے انچیں کار و بہ کن اَنت کہ بلوچ راج ءَ سیت بہ بیت۔ گوادر ءَ واجہ سیدھاشمی ءِ بت پروشگ بیتگ۔ سید ھاشمی بلوچ راجی ندانک ءِ تہ ءَ انچیں مزن شان ءُ مزن نامیں مردمے کہ واجہ ھیربکش مری ءُ شھید اکبر ھان بگٹی ، سیاست ءِ تہ ءَ اَنت۔ بلے ھچ ندانک ءُ در ندانکی گلے ءَ ایشی ءِ سر ءَ زھرشانی نہ کرت۔ھمے پیم پنجگور ءَ شھید اکبر ھان بگٹی ءِ بت چگل دیگ بوت ، ایشی ءِ پدگوانک ءُ پدکرد ءَ ھم کس ءَ ھچ نہ گْوشت۔ ھما گل کہ آیانی لوٹ ءُ شوندات چہ بی این ایم ءَ نرم تر اَنت ءُ بلوچستان ءِ سھرائیں سیاست ءِ پڑ ءَ کار ءَ اَنت ، آیاں باید اے جیڑھانی سر ءَ ترندیں رنگے ءَ پسو بہ داتین ءُ زھرشانی کرتیں۔
