بیگواھیں بلوچانی توار ( وی بی ایم پی ) ءِ سرکماش نسراللہ ءَ ماں رسانکدر ءَ وتی شنگ کرتگیں درشانے ءَ گوشتگ کہ زورگریں پاکستانی لشکر ءِ دست ءَ زوربیگواہ کنگ بوتگیں اسامہ پندرانی ءِ بیگواھی ءِ کیس کھول ءَ گل ءِ کر ءَ یاداشت کرتگ۔
ھلیل الرھمان ءَ وتی برات ءِ زوربیگواھی بابت ءَ گوشتگ کہ پاکستانی لشکر ءِ چیریں ادارہ ءِ کارمنداں من برات 22 اگست 2023 ءَ چہ کلات ءَ مزنیں مسیت ءَ آوار جتگ۔
آئی گوشتگ کہ من ءَ پون کرتگ اِش کہ وتی برات اسامہ ءَ بہ گوش مزنیں مسیت ءَ بیا من وتی برات پون کرت ءُ گوشت کہ بیا مسیت ءَ منی برات اسامہ ءُ آدگہ براس ھواری ءَ آتک اَنت مارا سئے ایں براتاں چیریں ادارہ ءِ کارمنداں وتی گاڑی ءَ سوار کرت ءُ دور برگ ءَ پد من ءُ منی آدگہ برات چہ گاڑی ءَ ایر کرت اِش ءُ گوشتگ کہ چہ اسامہ ءَ جست ءُ پرس کن ایں ءُ پد ءَ یل کنانے۔
آئی گوشتگ کہ نوں آئی ءَ یک سالے سرجم بوتگ کہ انگت یل کنگ نہ بوتگ کہ چہ انچو بیگواھی ءَ پہ اسامہ ءُ تاوان دیگ ءَ ترس اِنت کہ چیریں ادارہ ءِ کارمند آئی ءَ تاوان مہ دئے اَنت چہ آئی زوربیگواھی ءِ سوب ءَ آئی کھول سسائی نادراھی ءِ آماچ اِنت۔
نسراللہ ءَ گوشتگ کہ گل ءَ اسامہ ءِ کھول دلجمی ءَ داتگ کہ اسامہ ءِ کیس ءَ سرکار ءُ اکوام متھدہ ءَ سر کنت ءُ پہ آئی آجوئی ءَ ھمک جاہ ءَ توار چست کن ایں۔
نسراللہ ءَ چہ سرکار لوٹ کرتگ کہ آ اسامہ پندرانی ءِ زوربیگواھی ءِ باروا دلگوش بہ دنت ءُ پہ آئی آجوئی ءَ وتی کرد ءَ پیلو بہ کنت ءُ آئی کھول ءَ چہ آزاراں در بہ رکین ایت۔
