بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں نوشکے کادر آباد ءَ زورگریں پاکستانی لشکر ءِ یک کاروانے ءِ سرءَ سنگر گپتگ ءُ ارش کرتگ۔ ایشی آسر ءَ زورگریں لشکر ءِ کم چہ کم دہ کارمند جاھی مرتگ ءُ ارش ءَ پد برجاھیں دراجکشیں ارش ءَ بی ایل اے ءِ نہ ترسیں دوسرمچار شھید بوتگ اَنت۔
آئی ءَ گوشتگ کہ زی دوازدہ ءِ نزیک ءَ بی ایل اے ءِ سرمچاراں نوشکے ءِ پنچ کلو میٹر دوری ءَ کادر آباد ءَ زورگریں پاکستانی لشکر ءِ یک کاروانے ءِ سر ءَ سنگر گپتگ ءُ نشانگ کرتگ۔ چہ ایشی دژمنیں لشکر ءِ دہ کارمند جاھی مرتگ ءُ کم چہ کم چار ٹپی بوتگ اَنت۔
جارکش ءَ گوشتگ کہ زورگریں لشکر ءِ گون ءَ دراجکشیں جنگ ءِ میان ءَ بی ایل اے ءِ دو سرمچار ادنان ءُ یاسر پہ ماتیں سرڈگار ءِ دیمپانی ءَ گوں توکل ءُ جوانمردی ءَ شھید بوتگ اَنت۔ شھید ادنان چہ دژمن ءِ یک تیرے ءِ لگگ ءَ ٹپی بوتگ، بلے آئی گوں ٹپی ئیں جاوراں وتی سنگر داشتگ ءُ یک گنٹھے ءَ گیش دیم پہ دیمی کرتگ، وتی بنزہ واتر چہ مھکمیں راھاں کش اتگ ءُ شھید بوتگ۔
آئی ءَ گوشتگ کہ زورگریں لشکر ءِ سر ءَ ارش ءِ میان ءَ بی ایل اے ءِ دگہ یک نہ ترسیں سرمچارے یاسر دژمن ءِ گون ءَ دراجکشیں جنگ ءَ دیم پہ دیمی کنگ ءَ ٹپی بوتگ۔ دژمن ءِ پدکنز کنگ ءَ پد گوں ٹپی ئیں جاوراں وتی مھکمیں بندر ءَ سر بوتگ۔ چہ گیش ھون ءِ رچگ ءَ آ شھید بوتگ۔
جارکشءَ گوشتگ کہ شھید سنگت ادنان پنام سپر ھان ء وزیر اھمد نوشکے ءِ ھند کلی مینگل ءِ جاہ منند اِنت۔ انٹرنیشنل ریلیشنز ءَ بی ایس ءِ نودربر ادانان 2023 ءِ بندات ءَ بی ایل اے ءَ ھوار بوتگ۔ آ پہ راجی آجوئی ءَ شھری چیرجنگی ءِ پارست ءَ وتی زمہ واری پیلو کنگ ءَ بوتگ۔ اے میان ءَ آ نوشکے شھر ءُ کر ءُ کشاں جتائیں کاروائیاں وتی کارشونی پیش داشتگ اَنت ءُ دژمن بازیں تاوان داتگ۔ آئی گوں توکل،نہ ترسی ءُ ایمانداری ءِ جوانیں درورے برجاہ داشتگ۔ آئی دژمن ءَ بازیں جنگاں پروش داشتگ ءُ گڈی ءَ یک نہ ترسی شھیدی یے وتی نام ءَ کنگ ءَ سوبین بوتگ۔
آئی ءَ گوشتگ کہ شھید یاسر زھری پنام ماسٹر سپرھان ء لال جان زھری ھزدار ءِ ھند مولہ ءِ جاہ منند اِنت۔ بیست ءُ ھپت سالیگیں یاسر یک میکنیکل انجیئنرے بوتگ۔ آ 2018 ءَ بی ایل اے ءَ ھوار بوتگ ءُ راجی ایردستی ءِ بگیری ءَ شھری ءُ کوھی جنگ ءَ وتی لشکری کار پیش کرتگ اَنت۔ سنگت یاسر بولان ءُ شورپارود ( کلات )ءِ جنگاں باز مزنیں کاروائیاں بھر زرتگ ءُ دژمنیں لشکر ءِ پروش دیگ ءَ جوانیں کردے پیلو کرتگ۔ آئی ءَ ایمانداری، بھادری ءُ جپاکشی ءِ ھواری ءَ وتی روچ ءُ شپ پہ آجوئی ءَ ببا داتگ۔ آ بی ایل اے ءِ یک سکا نہ ترس ءُ زانوگریں سپاھیگی یے بوتگ۔
جیھند ءَ گوشتگ کہ بی ایل اے شھید سنگت یاسر ءُ شھید سنگت ادنان ءِ توکل، بھادری ءُ بلوچ سرڈگار ءِ وپاداری دیم ءَ آرتگ اَنت ءُ شھیدی ءَ آیان ءَ ستک شانی ندر کرتگ ءُ ھمے کول کرتگ کہ بی ایل اے وتی شھیدیانی گرانبھائیں کرد ءَ کدی بے ھال نہ کنت ءُ آیانی دیمونی ءِ بیر راجی آجوئی ءِ دروشم ءَ گرگ بیت۔
