بلوچ راجی راھشون ءُ بلوچستان آجوئی سنگر (بی ایل ایپ) ءِ سرکماش ڈاکٹر اللہ نزر ءَ وتی یک درشانے ءَ مستونگ ویل گوں تُرندی ءَ ایرجتگ ءُ گْوشتگ کہ من مستونگ بلوچستان ءَ بیتگیں دلپدردیں ویل ءَ سک دلپدرد آں کہ ریاست ءَ گوں چیرکُرتگیں شورھاں وانگجاہ ءَ روگ ءَ بیتگیں کودکیں زھگانی جان پہ بے دردی پُل اِتگ اَنت۔
آئی ءَ گْوشتگ کہ ناشرکاری ءِ اے بُزدلیں کار مردمگری ءِ بگیری ءَ یک ٹوھیں میارباری یے ءُ تچکی ءَ مردمی ھکانی بگیری ءِ دگہ یک درورے۔ اے دلپدردیں ویل مارا پہ جیڑگ ءَ لاچار کنت کہ مئے دژمن چنچو بےسر ءُ وکشی یے کہ آئی ءِ دستاں مئے زھگ ھم پھریز نہ اَنت۔
آئی ءَ گْوشتگ کہ اے وڑیں رستریں اُرش پاکستانی ریاست ءِ نیمگ ءَ بلوچ آجوئی زْرمبشت ءِ زور دیگ ءِ یک پندلے۔ ایشی ءَ اگاں مزھبی ناشرکاری ءِ نام ءَ دے اِت یا دگہ چیزے، بلے اے دُرسیں کارانی پُشت ءَ تچکی ءَ پاکستانی ریاست ءِ دست مان اِنت۔ اے اُرش نہ تیوک ءَ بلوچ راج ءِ سر ءَ برجاھیں زوراکیاں پدر کنت بلکیں چہ دھکاں برجاھیں زوراکی ءُ تچکے ءَ مردمی ھکانی بگیریانی نشون کنت۔
بلوچ راھشون ءَ گْوشتگ کہ زور بیگواھی، در آمیدگسی کوش ءُ مچی سزا ءِ وڑیں پندلاں زورگریں پاکستانی ریاست، بلوچستان ءَ تُرس ءُ ناایمنی یے برجاہ دارگ ءِ جُھدے کنگ ءَ اِنت۔
آئی ءَ گْوشتگ کہ پاکستانی ریاست ءِ اے زوراکیں پندلانی آماچیں ھزاراں کھول وتی مردمانی زندمان ءَ لوٹگ ءَ زھرشانی گدان ءُ دگانی سر ءَ زندگی گْوازینگ ءَ لاچار اَنت۔ اے بے وسیں کھولانی جاور بلوچ راج ءِ سر ءَ دیگ بیتگیں زوراکی ءِ ھنچیں اکسے پیشدار ایت کہ مردم ءِ زِرد ءَ سُرین ایت۔
ڈاکٹر اللہ نزر ءَ گْوشتگ کہ پاکستانی ریاست ءِ نیمگ ءَ مزھبی ناشر کاری بلوچ راج ءِ بھر ءُ بانگ کنگ ءُ آئی ءِ گھگیری ءِ ھلاس کنگ ءَ یک سلاھے ءِ دْروشُم ءَ کارمرد کنگ ءِ شوندات بے سوب بیتگ اَنت۔ بلوچ راج ءَ ھرچ وڑیں زوراکی ءُ جنجالانی دیمپانی کُرتگ ءُ آجوئی ءِ جُھد ءِ تہ ءَ گوں تمردی ءَ وتی مھکمی پدر کُرتگ۔ آیانی اے گھگیری گرانبھائیں دیمونیانی برورد اِنت ،ایشانی تہ ءَ جنین، زھگ ءُ ورنا ھوار اَنت کہ آیاں وتی گرانبھائیں جان ندر کُرتگ اَنت ءُ راج زوراکی ءِ بگیری ءَ اوشتگ ءِ سکین داتگ۔ بلوچ شھیدانی اے دیمونی آیانی تمردی ءُ مھکمی ءِ منانک اِنت۔ ھرچ شھید ءِ دیمونی ءَ راج گیش مھکم کُرتگ۔ زوراکیں ریاست ءِ دُرسیں پندل بے سوب بیتگ اَنت ءُ بلوچ راج ءِ آجوئی ءِ جُھد روچ پہ روچ مھکم تِر بیان اِنت۔
بی ایل ایپ ءِ سرکماش ءَ گْوشتگ کہ مستونگ ویل ءِ آماچیں کھولانی درداں شریدار آں ءُ دلپدردی درشان کناں۔ آیانی تاوان گوں دانکاں آسر کنگ نہ بیت بلے ما آیانی درداں مار اِت کن ایں ءُ گوں آیاں ھوار ایں۔ پہ ٹپی بیتگینانی زوت جان دُراہ بیگ ءَ دوا کنگ ءِ ھوار،من چہ میان استمان ءَ دزبندی کناں کہ آ بلوچستان ءَ برجاھیں ریاست ءِ زور ءُ زوراکیں شونداتاں پہ دلجمی ءَ دلگوش گْور بہ کنت۔ بلوچستان ءِ ایردستیں راج آجوئی ءِ جُھدے کنگ ءَ اَنت،آیانی پلہ مرزی کنگ ھژدری اِنت۔ما چہ میان استمان ءَ نساپ ءِ اوست ءَ دار ایں کہ آ بلوچ راج ءِ پلہ مرزی ءَ آجوئی ءَ بہ منّ ایت ءُ جُھد ءِ پلہ مرزی ءَ توار چِست کنت۔
