کیچ: مند ءَ آدینگ ءِ روچ ءَ زورگریں پاکستانی لشکر ءِ زورکیانی بگیری ءَ مردماں زھرشانی ءَ شھدگ بند کرتگ۔ زھرشانی ءَ جنین ءُ زھگ ھم ھوار بوتگ اَنت۔
زھرشانی کنوکانی گوشگ اِنت کہ زورگریں پاکستانی لشکر مئے گس ءُ ڈگاراں دستیگ کنگ ءُ پہ وت ءَ بنجل ءُ پانگس جوڑ کنگ ءَ اِنت۔
آیاں گوشتگ پاکستانی لشکر ءَ چہ مئے گس ءُ ڈگاراں اَبید زھگانی وانگجاه ھم دستیگ کرتگ ءُ نشتگ۔ چہ پاکستانی لشکر ءِ نیمگ ءَ مارا پہ زھرشانی ءَ بیھار دیگ بوتگ کہ شما زھرشانی مکن اِت۔
آیاں گوشتگ کہ ما چه سرکاری ادراھاں لوٹ اِیں کہ مئے گس ءُ ڈگاراں چه لشکر ءِ دست ءَ بگر اَنت۔ اگاں چہ مئے گِس ءُ ڈگاراں پاکستانی لشکر ءِ پانگس ھلاس کنگ نہ بوت اَنت ما وتی زھرشانیاں گیش ترند کن ایں۔
