اسلام آباد: چہ راولپنڈی ءَ نمل زانشتجاہ ءِ بلوچستان ءِ جتائیں ھند ءُ دمگانی جاہ منندیں دہ بلوچ نودربر آوار جنگ ءُ بیگواہ کنگ بوتگ اَنت۔
بلوچ اسٹوڈنٹس کونسل اسلام آباد ءَ وتی شنگ کرتگیں درشانے ءَ گوشتگ کہ گوشتگ کہ دوشی شپ ءِ دہ ءَ دہ بلوچ نودربر IJP میٹرو اسٹیشن راولپنڈی ءَ چہ وتی وابجاہ ءَ زور بیگواہ کنگ بوتگ اَنت۔ زور بیگواھیں درسیں نودر نمل زانشتجاہ اسلام آباد ءِ نودربر اَنت۔ آیانی مرچی چکاس ءِ پیپر دیگی بوتگ بلے آ سھب ءَ پپر دیگ ءَ سر نہ بوتگ اَنت آیانی ھمبلیں نودربراں رھوت کنگ ءِ جھد کرتگ بلے آیانی ھال ءُ اھوال نہ بوتگ گڑا ھم تبکیں نودربر آیانی جاہ ءَ شتگ اََنت اود ءَ ھم گندگ نہ بوتگ اَنت ءُ آیانی سامان ھمود ءَ ایر بوتگ اَنت۔
جارکش ءَ دیمتر ءَ وتی درشان ءَ گوشتگ کہ چہ اے وڑیں ھیلھاں نودربرانی توار دارگ نہ بیت ءُ ما نزور نہ بہ ایں۔ ما اے باروا وتی آھوکیں گامگیج ءِ جار ءَ جن ایں۔
آئی ءَ گوشتگ کہ زور بیگواھیں نودربرانی نام سلام آرپ ء آرپ الی جاہ منند تربت کیچ بی اے ءِ ششمی بھرگ ءِ نودربر اِنت۔ بالاچ پدا ء پدا اھمد جاہ منند تربت کیچ، بی بی اے ءِ ھشتمی بھرگ ءِ نودربر اِنت۔ ھدا داد ء ابدالکادر دشت ڈڈے کیچ ءِ جامنند اِنت ءُ آئی آر ءِ ھشتمی بھرگ ءِ نودربر اِنت۔ ھلیل اھمد ء سومار جاہ منند تیرتیج آواران آئی آر ءِ ھپتمی نودربر اِنت۔ ھمل ھسنی ء سید مھمد آواران ءِ جاہ منند اِنت، آئی آر ھپتمی بھرگ ءِ نودربر اِنت۔ ھلیل اھمد ء اکبال ڈنڈار جاہ منند اِنت ءُ آئی آر ھشتمی بھرگ ءِ نودربر اِنت۔ بابر اتا ء اتا مھمد پنجگور آئی آر ءِ ھپتمی بھرگ ءِ نودربر اِنت۔ نور مھیم ء مھیم جاہ منند پنجگور آئی آر ءِ پنچمی بھرگ ءِ نودربر اِنت۔ اپتکار آزم ء مھمد آزم آواران ءِ جاہ منند اِنت ءُ ایجوکیشن ءِ ھپتمی بھرگ ءِ نودربر اِنت۔ اھسام ء اکبر جاہ منند پَنجگُور آئی آر ءِ ھشتمی بھرگ ءِ نودربر اِنت۔
