شال: بلوچ وومن پورم شال ھنکین ءِ نیمگ ءَ ھیلکاری دیوانے ھنکین ءِ کمک سرکماش سلتانہ ءِ سروکی ءَ برجم دارگ بوتگ، دیوان ءِ گچینی مھمان بُنجاھی سرکماش ڈاکٹر شلی ءُ بُنجاھی پتر ءِ باسک رُکیہ بلوچ بوتگ اَنت۔
دیوان ءَ اِرم بلوچ ءَ بندات ءَ چین ءِ بندپتر ءِ سر ءَ کسانیں چمشانکے داتگ ءُ گوشت کہ چین چہ گوست ءِ کوھنتریں دودماناں یکے ءُ آئی ءَ گوں دودمانی ربیتاں ھوار دیمروی کُتگ۔ بندات ءَ چین ءَ بادشاھی نزام ءِ انچیں مھکمیں دروشم ءِ گندگ بوتگ کہ اود ءَ مردمانی گورا ھمے ربیت بوتگ کہ ھما مردم کہ بادشاہ بیت آئی ءِ سجدہ کنگ وتی منّارینگ ءِ راھے منّگ بیتگ۔
آئی ءَ گوشتگ کہ چین ءَ ھمے وھد ءَ بندپتر نویسی ھم بنا بیت ءُ اشی ءَ ابید اے ھما دؤر اِنت کہ چین ءَ کنپیوشس ءِ نیکراہ ھم دیم ءَ کیت کہ آئی ءِ مزنیں سانے چین ءِ مھلوک ءِ سرا کپ ایت بازیں مردم ایشی ءِ منوک بنت۔چین ءَ بادشاھی نزام ءِ بگیری ءَ 1900 داں 1911ءَ آشوبے گندگ بیت کہ آئی ءِ تہ ءَ مستریں نام سن یات سین اِنت کہ آ بادشاھی نزام پروش داتگ۔
آئی ءَ گوشتگ کہ چین ءَ 1917 داں 1925 ھما دؤر انت کہ کمیونزم ءِ بندات بیت۔ چین ءَ کمیونزم ءِ لیکہ ءِ مستریں منوک آ پیکنگ زانشتجاہ ءِ تاریک ءِ پروپیسر ءِ ءُ لائبریرین ھم بیتگ کہ کمیونزم ءِ لیکہ ءِ دیمروئی ءَ آئی ءِ مزیں دستے بوتگ۔ اے وھد ءَ پدا ماؤزے تنگ ءِ نام ھم دیم ءَ کیت کہ آ ھواری ءِ لیکہ ءِ مزنیں منوگرے بیت، بلے وھدے آچین ءِ جیڑھاں یا چین ءِ گیشتر کہ ھما آبادی ھست اَنت آ دھکانانی بیت گُڑا آ اے آسرا کییت وھدے داں آ اے جھد ءَ ھوار مہ بنت گڑا چین ھچ وڑا دیمروئی کُت نہ کنت۔
گُڈ سر ءَ بازیں جست ءُ پسواں پد دیوان ءِ ھلاسی ءِ جار جتگ۔
