شال : کماشیں بلوچ سروک استاد واھد کمبر ءِ چہ ایران ءَ آوار جنگ ءُ زور بیگواہ کنگ ءِ بگیری ءَ آئی ءِ جنک مھلب کمبر ءَ بلوچستان آمیدگس ءَ آئی ءِ کیس جم کُرتگ۔ آمیدگس ءَ آئی ءِ کیس زُرتگ ءُ ھمے کیس ءِ باروا واکدار لوٹ اِتگ اَنت۔
مھلب کمبر ءَ اے باروا ایکس ءَ یک تامُرے شنگ کُرتگ ءُ گْوشتگ کہ منی پِت چہ ایران ءِ شھر کرمان ءَ آوار جنگ بیتگ، اے باروا مزن آمیدگس ءَ آئی ءِ کیس نبشتگ ءُ ھمے کیس ءِ باروا واکدار لوٹ اِتگ اَنت۔
مھلب ءِ رد ءَ آمیدگس ءَ تھی کارانی وزیر ، ٹکی وزیر ءُ ایران ءِ کونسل جاہ ءِ سروک ھمے جیڑہ ءِ باروا آمیدگس ءَ لوٹ اِتگ اَنت کہ دیم ءِ پیشی ءَ آمیدگس ءَ پیش بنت ءُ ھمے جیڑہ ءِ سر ءَ گپ کن اَنت۔
استاد واھد کمبر ءِ جنک شاری کمبر اے کیس ءِ رندگیری ءَ کنگ ءَ اِنت۔
استاد واھد کمبر، بلوچ راجی زْرمبشت ءِ کلانھیں سروک اِنت کہ پاکستانی چیریں ادارھاں 19 جولائی 2024 ءَ چہ ھمساھگیں ڈیھ ایران ءَ آوار جتگ ءُ بیگواہ کُرتگ۔ مھلب ءَ وتی پِت ءِ زور بیگواھی ءِ بابت ءَ پریس کانپرنس کُرتگ ءُ گْوشتگ کہ چہ ایشی ءَ پیش 14 مارچ 2007 ءَ پاکستان ءِ چیریں ادارھانی کارمنداں پولیس ءِ کمک ءَ استاد واھد کمبر ءَ گوں آئی ءِ ھمراھانی کمک ءَ دزگیر کُرتگ ءُ داں نوہ ماہ ءَ زور بیگواہ کُرتگ۔ انچو مُدت ءَ آزارجاھانی دارگ ءَ پد ریاست ءِ واکداراں ناشرکاری ءِ دوازدہ کیس آئی ءِ نام ءَ کُرتگ ءُ پولیس ءِ کرمنل انویسٹی گیشن ڈیپارٹمنٹ (سی آئی ڈی) ءِ دست ءَ داتگ ءُ ھمے وڑ ءَ دیم ءَ آرگ بیتگ، پاکستان ءِ آمیدگساں آئی ءِ کیس نبشتہ کنگ بیتگ۔
آئی ءَ گْوشتگ کہ منی پِت2011 ءَ آمیدگس ءَ دروگ ءُ بےسریں ارزی ءِ باپُشت ءَ یل داتگ۔ایشی ءَ ابید ریاست ءِ ادارہ چہ آئی ءِ سیاسی لیکہ ءِ بنیاد ءَ آئی ءِ رندگیری ءَ یل نہ کن اَنت۔ پاکستانی لشکر ءَ مئے گس ءَ ھم بیڑ بُرتگ ءُ مئے گسانی سر ءَ تیر گْواری ھم کُرتگ۔ ھمے جاورانی سْوب ءَ منی پِت چیر بیگ ءَ لاچار بیتگ ءُ آئی دراجکشیں وھدے چیری ءَ گْوازینتگ۔
مھلب ءِ رِد ءَ انیگیں وھد ءَ آ دْراہ نہ بیتگ ءُ دل ءِ نادراھی ءِ ھواری ءَ دگہ نادراھیانی آماچ بیتگ۔ پمشکا آ وتی سیادانی کمک ءَ روکپتی بلوچستان ءَ شُتگ کہ چہ اود ءَ پہ درمان کنگ ءَ ایران ءِ شھر کرمان ءَ برگ بیتگ۔ دیر ءَ درمان کنگ ءِ سْوب ءَ ھما شھر ءَ جھمنند بیتگ داں کہ ڈاکٹرانی کِر ءَ روگ ءُ آھگ ءَ آسانی بہ بیت۔ 19 جولائی 2024 ءَ منی پِت واھد کمبر پہ چیز ءِ گِرگ ءَ چہ گس ءَ ڈن روت کہ گس ءِ نزیک ءِ دکان ءَ سامان زورگ ءَ بیت کہ یک اسپیتیں پژو پارس گاڑی یے کیت ءُ چار مردم بنت منی پت ءَ پہ زور گاڑی ءَ سوار کنگ ءِ جُھد ءَ کن اَنت۔ منی پِت گھگیری کنت نزیکیں دکاندار ھم تہ ءَ دور کن اَنت بلے آ بیھار دے اَنت ءُ منی پِت ءَ آوار جن اَنت ءُ گوں وت بر اَنت۔
آئی ءِ کھول ءَ گْوشتگ کہ استاد واھد کمبر ءَ گوں کس ءَ زاتی جیڑہ نیست ءُ آ گوں بلوچ جُھد ءَ بندوک اِنت،پمشکا ما دلجمیں کہ آئی ءَ پاکستان ءِ چیریں ادارھاں گوں وتی کمکارانی کمک ءَ زور بیگواہ کُرتگ۔ آ یک 74 سالی کماشیں مردمے ءُ باز نادراھی ءِ آماچ اِنت۔پاکستان ءِ تہ ءَ آئی ءِ بگیری ءَ ھچ پیمیں ارزی نبشتہ نہ بیتگ، پیش ءَ ھم آ چہ بازیں دروگیں ارزیاں یل کنگ بیتگ، پمشکا نادراھی ءِ سْوب ءَ آ زوت یل کنگ بہ بیت۔
