بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں بارکان ءِ ھند جاندران کوہ ءَ موبائل ٹاور ءُ مشین ءُ سامان مانداشتگ اَنت ءُ مستونگ کڈ کوچگ ءَ لیویز کارمندانی سلاہ دستیگ کرتگ اَنت۔
آئی ءَ گوشتگ کہ 23 اکتوبر ءِ بیگاہ ءِ ھپت ءَ بارکان ءِ ھند بیبر ٹک جاندران کوہ ءَ مکیں یوپون ٹاور ءُ مشین ءُ سامان تیرگواری کرتگ ءُ مانداشتگ اَنت۔
جارکش ءَ گوشتگ: وھدے کہ دومی کاروائی 28 اکتوبر ءِ نیمروچ ءِ یک ءَ مستونگ کڈ کوچگ ءَ ترّ ءُ گرد ءِ میان ءَ لیویز کارمندانی سلاہ دستیگ کرتگ اَنت، مردمگری ءُ بلوچی ءِ بنیاد ءَ یل داتگ اَنت۔
آئی ءَ گوشتگ کہ بلوچستان ءِ جتا ءُ لھتے ھنداں گیشتر ٹاور مک کنگ بلوچ سرمچارانی پرکاری ءُ ترّ ءُ گردانی چار ءُ بچار کنگ اِنت۔ بیست ءُ یکمی کرن ءَ بلوچ سرمچار کم مڈی کارمرز کنگ ءُ ریاستی شوربندیاں نشانگ کنگ ءَ اَنت کہ اے سرمچارانی سوبمندی ءِ منانک اِنت۔
جارکش ءَ گوشتگ کہ لیویز ءُ پولیس لشکر ءِ پرکاریں بلوچ کارمنداں ما مدام کڈن کنگ ءَ ایں کہ بلوچ سرمچارانی رندگیری، آیانی راھانی بندگ ءُ بلوچ لّس مردمانی بگیری ءَ زورگریں ریاستی لشکر ءُ چیریں ادارھانی زوراکیانی گون ءَ شریدار بوگ ریاستی مشینری ءِ کمک کنگ ءَ گستا بہ بہ اِت، اگاں نہ بی ایل ایپ لیویز ءُ پولیس ءَ ھما وڑ ءَ نشانگ کنت انچوش کہ پاکستانی لشکر، چیریں ادارہ ءُ آیانی ھندی کمکار ءُ چاریگاں نشانگ کنت۔
آئی ءَ گوشتگ کہ زورگریں ریاست ءِ توپک زوراکی ءِ نشانی اِنت ءُ ھندی مردمانی دست ءَ وتی توپک ءِ دیگ ھمے پیش دارگ لوٹگ ءَ اِنت کہ اے کالونیل زوراکی ءُ لُٹ ءُ پل ءَ ھندی مردم پلہ مرزی کنگ ءَ اَنت۔ ھمے ھندی سلاہ بنداں آ بلوچ چکچینی ءَ کارمرز کنت ءُ ھمیشانی پارست ءَ وتی زورگپتی ءَ برجاہ دار ایت۔
جارکش ءَ گوشتگ کہ ما ھچ وڑ ءَ ایشی موکل ءَ نہ دے ایں کہ آ زورگار یا کار ءِ نام ءَ بلوچ سرڈگار ءِ سر ءَ زورگر ءِ کمکار بہ بنت ءُ دست ءَ داتگیں توپک ءِ دیم بلوچ سرمچار یا بلوچ لّس مردمانی نیمگ ءَ بہ بیت۔ مرچی یکبرے پد ءَ وتی سرڈگار ءِ جاہ مننداں گوش ایں کہ آ ریاست ءِ داتگیں توپک ءَ بلوچ راج ءُ مردمگری ءِ بگیری ءَ میارباری ءَ کارمرز کنگ ءِ جاہ ءَ وتی راج ءُ پہ مردمگری ءَ جوانیں کردے پیلو بہ کن اَنت۔
آئی ءَ گوشتگ کہ بی ایل ایپ بلوچ راج ءَ دلجمی دنت کہ بلوچ چکچینی ءَ ھواریں ریاست ءُ گوں اے ریاست ءَ میارباری ءَ شریداریں چہ درسیں بدکرداں جست ءَ گراں کنت۔
میجر گھرام ءَ اُرشانی زمہ واری منّ اتگ ءُ گوشتگ کہ ھمے کول ءَ کن ایں کہ داں بلوچستان ءِ آجوئی ءَ زورگریں لشکر ءُ آئی شریداراں نشانگ کن ایں۔
