روکپتی بلوچستان ءِ ھند شستون (سراوان) ءَ لبزانکی ءُ ربیدگی گل آتار ءِ دیوانجاہ ءَ پنچ شمبے ءِ بیگاہ ءِ پنچ ءَ چاگردی کِرد ءِ بنگپ ءِ سر ءَ دیوانے برجم دارگ بیتگ۔
دیوان ءَ آتار ءِ باسکاں ھوار چاگردی ءُ لبزانکی مردماں بازیں کچے ءَ بھر زُرتگ ءُ وتی ھیال ءُ لیکہ درشان کُرتگ اَنت۔
آیاں تران کنان ءَ گْوشتگ کہ چاگرد ءِ تہ ءَ نشتگیں ھمک ھما مردم کہ گوں چاگرد ءِ کجام بھرگ ءَ سیادی دار ایت آئی ءَ پہ چاگرد ءِ دیمروئی ءَ وتی کِرد پیلو کنگی اِنت۔ اگاں چاگرد ءِ نشتگیں مردم وتی زمہ واریاں مہ زان اَنت گڑا چاگرد پَدمنتگ بیت۔
آیاں گْوشتگ کہ ھرچ سوھو ءُ زانوگریں مردم اے گپ ءَ شرے ءَ زانت کہ وھدے چاگرد پدمنتگ بہ بیت گڑا اود ءَ مردم وڑ وڑیں سلکاریانی آماچ بنت ءُ مردم چہ وتی زبان، زمین،دود ءُ ربیدگ ءُ راجی زمہ واریاں شُمشکار بنت۔
