ھزاراں کھول پاکستانی لشکر ءِ زوراکیانی آماچ اِنت۔
بلوچ راجی زْرمبشت ( بی این ایم) ءِ جارکش ءَ گْوشتگ گجر مشکے ءَ پاکستانی لشکر ءِ باڑھی کشندھاں گل ءِ دیرگیں دوزواہ ابدل ھک ء جنگی ھان ءُ لیاکت ء نیکسال نشانگ کرتگ ءُ کشتگ اَنت۔کشگ بیتگیں ابدل ھک جنگی ھان پاکستانی لشکر ءَ باز بر ءَ دزگیر ءُ زور بیگواہ کرتگ اَت، اے میان ءَ آ سک باز لٹ ءُ آزار دیگ بیتگ اَت۔
جارکش ءَ گْوشتگ شھید ابدل ھک ءِ آجوئی دوستیں کھول گل ءِ پلہ مرز اِنت۔ اے کھول ءَ دژمن ءِ سجھیں زوراکیاں پد ھم چہ زْرمبشت ءَ پدکنزگ ءِ جاہ ءَ دیمونی دیگ ءِ راہ گچینتگ۔
آئی ءَ گْوشتگ شھید ابدل ھک ءِ کھول مشکے ءِ کوھاں نندوکیں مالدارے اَت۔پاکستانی لشکر ءَ 21 جنوری 2016 ءَ منجو مشکے ءَ ابدل واھد ء جنگی ھان ءُ دلشاد ء میر مھمد رھیم مھمد ھسنی کشت اَنت ، سجھیں گس پلگ ءَ پد بن دات اَنت۔ چہ ایشی ءَ پد ھم پاکستانی لشکر ءِ ارش ءُ بیڑ بند نہ بوت اَنت ، چہ یکو بیتگیں ارشاں اے کھول دلسیاہ بوت ، وتی بیھی ھند ءُ روگاز ءِ در ءُ پارستے یلہ دات اَنت ، لڈ اِت ءُ مشکے ءَ شت ، بلے اد ءَ ھم آئی ءِ سر ءَ زوراکی آسر نہ بوت اَنت۔
جارکش ءَ گْوشتگ پروار مشکے ءَ لڈگ ءَ پد پاکستانی لشکر ءَ برے اے کھول ءِ سر ءَ تچکے ءَ ارش کرت ءُ برے وتی باڑھی کشندھانی پارست ءَ نشانگ کنان کرت۔
14 جون 2018 ءَ پروار مشکے ءَ لوگ ءِ سر ءَ پاکستانی لشکر ءَ وتی باڑھیانی پارست ءَ ارش کرت ءُ مبارک ء لشکری ءُ مھبت ھان ء مبارک کشت ءُ نور الھک ٹپی کرت۔ 30 جون 2023 ءَ جونگو مشکے ءَ پاکستانی لشکر ءِ چیرکاں مھمد ھیسا ء جنگی ھان کشت ءُ آئیءِ کسانسالیں چک سمیر ٹپی کرت۔21 اکتوبر 2024 ءَ گجر مشکے ءَ اے کھول ءِ سروک ابدل ھک ء جنگی ھان ءُ لیاکت ء نیکسال نشانگ کرت ءُ کشت اَنت۔ ابدل ھک ءَ سالے پیش وتی کھول ءِ سر ءَ بیتگیں زوراکیانی بارہ ءَ تامرے جوڑ کرت کہ چہ ’ زْرمبش ھال ‘ ءِ نیمگ ءَ شنگ کنگ بوت ، آ وھدی شھید ابدل ھک لشکری بنجلانی میان ءَ جاھمنند اَت ، پمیشکا آئی ءَ تامر ءِ تہ ءَ وتی گپ ءُ زبان ءِ انان داشتگ بلے انگت چہ اے تامر ءَ زوراکی ءُ آئی ءِ زمہ وار زانگ بہ اَنت۔
بی این ایم ءِ جارکش ءَ گْوشتگ شھید ابدل ھک ءِ کھول ءِ وڑیں ھزاراں کھول پاکستانی لشکر ءِ زوراکی ءُ بیمناکیں چکچینی ءِ آماچ اَنت بلے پاکستان گْور اے زوراکیاں ھم مردمانی گوں آجوئی ءِ زْرمبشت ءَ بندوکی ءِ آسر کنگ ءَ بے سوب اِنت۔
