تربت: بلوچ یکجھتی کمیٹی ءِ جار ءِ پد ءَ پہ زور بیگواھیں مردمانی آجوئی ءِ لوٹ ءَ زھرشانی روانکے کشگ بوتگ۔ روانک ءَ جتائیں دگاں ترّ ءُ گرد کنگ ءَ پد شھید پدا اھمد چاراہ ءَ مچ بوتگ اَنت۔
زھرشانی ءَ بی وائی سی سروک سبگت اللہ، سیاسی ءُ چاگردی گل ءُ پارٹیانی باسکانی ھواری ءَ زور بیگواھیں مردمانی کھول، جنین ءُ زھگاں بازیں کچے ءَ بھر زرتگ۔
چہ زھرشانی نندانک ءَ بلوچ یکجھتی کمیٹی ءِ سروک سبگت اللہ ءَ تران کرتگ ءُ گوشتگ کہ بلوچستان ءِ ھواری ءَ کراچی ءُ چہ پاکستان ءِ آدگہ جاھانی وانگجاھاں بلوچ ورنایانی زوریں بیگواھی تیز کنگ بوتگ۔ تیوک ءَ اکتوبر ءِ ماہ ءَ پنجاہ ءَ گیش بلوچ ورنا آوار جنگ ءُ بیگواہ کنگ بوتگ اَنت کہ گیشتریں نودربر اَنت۔
آئی ءَ گوشتگ کہ تربت ءِ لھتے جاہ پہ زور بیگواھیں مردمانی آجوئی جھد ءَ چیدگ بوتگ اَنت۔ تربت شھید پدا اھمد چاراہ یک انچیں چیدگے جوڑ بوتگ کہ ھمک دومی روچ ءَ مئے مات ءُ گھار پہ وتی بیگواھیں آزیزانی آجوئی ءَ پریات ءَ کار اَنت ءُ سرکار ءَ سر کن اَنت۔ بلے سرکار ءَ چہ ایشی ءَ ھچ پرک نیست۔
سبگت اللہ شاہ جی ءَ گوشتگ کہ سرکار ءِ سروکی ءَ نوں دزی ءُ ڈنگی ءِ درچ برجاہ اِنت، بلیدہ ءَ دومی رند اِنت کہ بینک لُٹگ بوگ ءَ اِنت۔ اے بری لٹ ءُ پل ءِ میان ءَ بینک ءِ پھادار ھم کشگ بوتگ۔ بلیدہ ءَ درزنانی کچ ءَ پانگس ھست اَنت بلے کس ءَ دز گیر نہ کرتگ اَنت۔
آئی ءَ گوشتگ کہ چہ زوریں بیگواھی ءَ آجو بوتگیں مردمانی نشانگ کنگ ءِ یک نوکیں درچے بندات کنگ بوتگ کہ دوشی سنگانی سر ءَ یک مردمے تیر جنگ ءُ ٹپی کنگ بوتگ۔ آ مردم ساری ءَ بیگواہ بوتگ ءُ رند ءَ یل کنگ بوتگ۔ مرچی آمیدگس ءَ آئی پیشی بوتگ۔
