بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 18 اکتوبر 2024 ءَ سرمچار کلات ءِ ھند نیچاری ءَ ترّ ءُ گرد کنگ ءَ بوتگ اَنت کہ سرمچار ءُ لیویز کارمندانی میان ءَ دیم پہ دیمی بوتگ۔ چہ لیویز کارمنداں سرکاری سلاہ دستیگ کنگ ءَ پد یل داتگ اَنت۔ ھمے روچ ءِ دو ءِ نزیک ءَ سرمچار پولیس ءِ پانگس ءَ شتگ اَنت ءُ لیویز کارمند اِش کڈن کرتگ اَنت کہ آ بلوچ راجی زرمبشت ءِ دیم ءَ اڑاند بوگ ءُ سرمچارانی رندگیری کنگ ءَ یل بہ کن اَنت اگاں نہ آیاں راجی میارباری ءِ بنیاد ءَ ترسناکیں سزا دیگ بیت۔ بلے لیویز کارمنداں چہ اے گپ ءِ گوش دارگ ءَ ابید سرمچارانی سر ءَ اُرش کنگ ءِ جھد کرتگ۔ ایشی پژدر ءَ سرمچاراں پہ پھریزگ ءَ سنگر گپتگ، پہ دیمپانی اُرش ءِ آسر ءَ لیویز کارمند ابدلکیوم مرتگ ءُ سپاھی رھمت اللہ نیچاری ٹپی بوتگ۔
جارکش ءَ گوشتگ کہ بلوچ راجی گل ءِ بستار ءَ مارا اے بلوچ ءِ جانی تاوان ءَ سکا رنج بوتگ ءُ ما گوں کھول ءَ ھمدردی کن ایں۔ بلے اے ویل ءَ پش ما مدام پولیس ءُ لیویز ءَ ھواریں بلوچ نوکر کڈن کرتگ اَنت کہ آ راجی زرمبشت ءِ بگیری ءَ پرکاری ءُ سرمچارانی دیم ءَ اڑاند جوڑ بوگ ءَ وت ءَ گستا بدار اِنت۔
آئی ءَ گوشتگ کہ مرچی یکبرے پد ءَ ما چہ گل ءِ گپ ءَ گوش ایں کہ بلوچانی جان ءُ مال مارا سکا دوست اَنت، پمیشکا کہ مئے جھد ءِ مول پہ بلوچ راج ءُ بلوچستان ءَ اِنت۔ چو جھان ءِ آدگہ زورگرانی وڑ ءَ مرچی پاکستان ھم زورگپتیں دمگ ءَ وت ما وتیں پروشت ءُ پروش ءِ ودی کنگ ءِ شونداتاں کار گرگ ءَ اِنت۔ اے وڑیں نازرکیں جاورانی تہ ءَ مئے زمہ واری بیت کہ ما ریاستی مشینری ءِ مھکم کنگ ءَ ابید وتی راجی زمہ واری ءَ بہ مار ایں۔
جارکش ءَ گوشتگ کہ ما مرچی یک گپے تچک کنگ لوٹ ایں کہ زورگر جتائیں ایردستانی تہ ءَ ھست ھچ وڑ ءَ ریاستی زوراکیاں کوپگ مہ دے اِت۔ اگاں اے باروا کجام ٹولی یا مردم ریاستی زوراکیانی بھر بہ بیت ءُ وتی مردمانی لٹ ءُ پل ءَ زورگر ءِ کمکاری ءِ کرد ءَ پیلو بہ کنت بلوچ آمیدگس ءَ آ الم جست گرگ بیت۔
آئی ءَ گوشتگ کہ ما یکبرے پد ءَ پولیس ءُ لیویز ءَ کڈن کن ایں کہ آ بلوچ بگیریں کارانی بھر جوڑ مہ بنت، اگاں نہ آ وتی زمہ وار وت اَنت۔
میجر گھرام ءَ اُرش ءِ زمہ واری منّ اتگ ءُ گوشتگ کہ ھما مردم ءَ نشانگ کن ایں کہ آ ریاستی پرمان ءِ سر ءَ بلوچ راجی زرمبشت ءَ تاوان دنت۔
