![](https://zrumbesh.com/wp-content/uploads/2024/01/Zrumbesh_24-01-01_22-41-48-400.jpg)
اسلام آباد: دو شمبے ءِ روچ ءَ بلوچستان سرکار ءِ پیشیگیں جارکش پرہ ازیم اسلام آباد ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ آتکگ ءُ گوں زھرشانی ءَ نشتگیں مردماں گپ ءُ تران کنگ ءِ جھد کرتگ ءُ گوشتگ کہ یک کمیشمے جوڑ کن ایں، گڑا اے درگت ءَ ڈاکٹر مھرنگ ءَ تران کرتگ ءُ گوشتگ کہ چنچو کمیشن ءُ پتر جوڑ کنگ بہ بیت درس بے واک اَنت۔ ما گپ ءُ تران کنگ لوٹ ایں بلے گپ ءُ تران کنوک ھچ کرت نہ کن اَنت۔ اگاں کسے اے کار ءَ کرت کنت اے ماتانی زھگاں یل کنائین ایت بہ کنت۔
اے بارو ءَ ڈاکٹر مھرنگ ءِ گوشگ اِنت کہ پرہ ازیم گوش ایت من وت ھچ کرت نہ کناں بلے گپ ءَ سر کرت کناں۔ مئے مردماں کش اَنت ءُ انگت ءَ گوش اَنت کہ مئے گون ءَ ترندیں گپ مکن اِنت۔
ڈاکٹر مھرنگ ءَ گوشتگ کہ گپ ءُ تران ءِ نام ءَ پہ زھرشانی ءِ پروشگ ءَ جھد کنگ بوگ ءَ اِنت۔ اد ءَ زور بیگواھیں مردمانی کھول آتکگ اَنت ءُ انگت ءَ کیت، ما اد ءَ داں ھما وھد ءَ نشتگیں دانکہ مئے لوٹ منّگ نہ بنت مئے زھرشانی برجاہ بیت۔
ڈاکٹر مھرنگ ءَ گوشتگ کہ بالاچ ءِ کوش ءَ آمیدگس ءَ گامگیج زورگی بوتگ، دزگیریں مردمے ءِ کوشگ بوتگ آمیدگس انگت بے توار اِنت۔
آئی ءَ گوشتگ کہ سرکار ءِ سنگینی ءَ پجار اِت یک نیمگے ءَ پہ گپ ءُ تران بٹاک جنگ بیت ءُ دومی نیمگ ءَ سرکار ءِ وزیر مئے بگیری ءَ پریس کانپریس کن اَنت ءُ زوریں بیگواھی ءِ درچ برجاہ اِنت۔ ھمک روچ ءَ زور بیگواھیں مردمانی لڑ ءَ دہ دہ مردم گیش کنگ بیت۔
ڈاکٹر مھرنگ ءَ گوشتگ کہ ما ھشکیں دلبڈی ءَ نہ لوٹ ایں مئے مردم چیریں ادارھانی کِر ءَ بندیگ اَنت آیاں آجو بہ کن اَنت ءُ اے درچ ءَ بند بہ کن اَنت۔