پنجگور: 31 ستمبر ءَ پاکستانی لشکر ءِ دست ءَ زور بیگواہ کنگ بوتگیں دوئیں برات سابر نور ءُ آبد نور ءِ کھول ءَ آیانی یل نہ کنگ ءِ بگیری ءَ زھرشانی روانکے کش اتگ ءُ کمک دمگدار ءِ کارگس ءِ دیم ءَ زھرشانی ءَ نشتگ اَنت۔
زھرشانی ءَ سیاسی ءُ چاگردی کارکناں ھوار جنین ءُ زھگاں بازیں کچے ءَ بھر زرتگ ءُ زوریں بیگواھی ءِ بگیری ءَ اوگام جتگ ءُ دوئیں براتانی آجوئی ءِ لوٹ کرتگ۔
کھول ءِ گوشگ اِنت کہ مرچی شانزدہ روچ اِنت سابر نور ءُ آبد نور بے میار ءَ ریاستی چیریں آزار جاھاں بندیگ اَنت ءُ آزارانی دیمپان اَنت۔ سرکار ءِ نیمگ ءَ مارا مدام دروگیں دلبڈی دیگ بوگ ءَ اِنت بلے پہ آیانی آجوئی ءَ انگت ءَ ھچ وڑیں گامگیج زورگ نہ بوتگ۔
آئی ءَ گوشتگ کہ پیسر ءَ مارا بیست ءُ چار ادار ءِ وھد دیگ بوتگ کہ ھمے وھدانی میان ءَ دوئیں براتاں آجو کن ایں۔ چہ ایشی پد مارا ھمک روچ باندا ءِ دروگیں دلبڈی ءَ دیگ ءَ اَنت بلے مئے زھگ انگت بیگواہ اَنت
کھول ءَ گوشتگ: ما مرچی لاچار ایں کہ دمگدار ءِ کارگس ءِ دیم ءَ زھرشانی ءَ بہ نند ایں۔ ما گوں پنجگور ءِ مردماں لوٹ کن ایں کہ آ بیا اَنت ءُ گوں سابر نور ءُ زاھد ءَ پہ درسیں بیگواھیں مردمانی آجوئی ءَ توار چست بہ کن اَنت۔
